Косово ўз армиясини ташкил этади. НАТО Приштина ва Белградни ортиқча ҳаракатлардан тийилишга чақирди

Косово Республикаси парламенти депутатлари мамлакатда тўлақонли қуролланган армия ташкил этилишини маъқуллашди. Бу ҳақда Pink.rs хабар қилмоқда.

Қайд этилишича, Косово Хавфсизлик кучларининг номи Косово Мудофаа вазирлиги, деб ўзгартирилган.

Ушбу қарорни 107 депутат қўллаб-қувватлади.

«Серб рўйхати» парламентдаги озчилик депутатлари бойкот эълон қилишди ва овоз беришга келишмади.

Ўз навбатида, НАТО бош котиби Йенс Столтенберг Косово Республикаси ўз армиясини ташкил этишга қарор қилганидан афсусда эканини билдирди.

«Мен бу қарор қабул қилинганидан афсусдаман. Бу НАТО ташвишда эканига қарамай, юз берди», - дея Столтенбергнинг баёнотини келтиради альянс матбуот хизмати.

Унинг сўзларига кўра, бу қадам «кераксиз вақтда қўйилди».

Бош котибнинг таъкидлашича, Косово хавфсизлик кучлари мандатининг ўзгариши билан НАТО улар билан ҳамкорлик даражасини қайта кўриб чиқиши керак бўлади.

Шунингдек, у Приштина ва Белградни хотиржамликни сақлаш ҳамда вазиятнинг кескинлашишига олиб келадиган ҳаракатлардан тийилишга чақирди.

Эслатиб ўтамиз, аввалроқ Сербия президенти Косово ғарб давлатлари томонидан қўллаб-қувватлаётганини айтганди.