Бугун, 26 декабрь куни Ўзбекистон Миллий олимпия қўмитаси Бош ассамблеясининг навбатдан ташқари 33-ҳисобот сайлов йиғилиши бўлиб ўтди.
Йиғилишда қўмита вице-президентлари, Бош ассамблея, Ижроия қўмита ва Тафтиш комиссияси аъзолари сайланди.
Бунга қадар вице-президент лавозимига жамоатчилик асосида сайланган Алишер Саидаббосович Султонов ва Мурод Бердиалиевич Азимов асосий меҳнат фаолиятидаги иш ҳажми ошгани, давлат хизматлари юзасидан муҳим топшириқлар ва давлат аҳамиятига молик йирик дастурлар ижросига масъул экани инобатга олиниб, уларнинг ўрнига бошқа номзодлар ўрганиб чиқилган.
Ўрганишлар натижасида Ўзбекистон таэквондо (WTF) ассоциацияси раиси Аҳмаджон Аминжонович Раҳимов ва Осиё Кураш Конфедерацияси президенти Комил Исмоилович Рўзиев номзодларига ишонч билдирилди ва улар бир овоздан Ўзбекистон Миллий олимпия қўмитаси вице-президенти этиб сайланди.
Бугунги кунгача Бош ассамблея ва Ижроқўм аъзоларининг айримлари бошқа ишга ўтганлиги сабабли, шунингдек, олдин сайланган баъзи номзодлар қўмитага аъзо бўлиш билангина кифояланиб, унинг фаолиятида бирор-бир ташаббус кўрсатмаганлиги учун Бош ассамблея ва Ижроқўм таркиби қайта кўриб чиқилди.
Ижроия қўмитанинг янгиланган таркибига қуйидаги номзодлар овозга қўйилди ва бир овоздан қўмита аъзолигига сайланди:
1. Умид Аҳмаджонов – Миллий олимпия қўмитаси президенти
2. Жасур Матчанов – Миллий олимпия қўмитаси Бош котиби
3. Аҳмаджон Раҳимов – Миллий олимпия қўмитаси вице-президенти
4. Комил Рўзиев – Миллий олимпия қўмитаси вице-президенти
5. Салим Абдувалиев – Миллий олимпия қўмитаси вице-президенти
6. Саида Маҳмудова – Ўзбекистон стол тенниси федерацияси раиси
7. Андрей Абдувалиев – Ўзбекистон енгил атлетика федерацияси раиси
8. Худоёр Аҳмедов – Ўзбекистон «Rowing and Canoeing» федерацияси раиси
9. Аламжон Муллаев – Ўзбекистон каратэ Миллий федерацияси раиси
