Ички ишлар органларининг қонуний талабига бўйсунмаганлик учун жавобгарлик кучайтирилади

Ўзбекистонда ички ишлар органларининг қонуний талабларини бажармаслик ёки хизмат бурчини бажаришга тўсқинлик қилганлиги учун жавобгарлик кучайтирилади. Бу ҳақда президент Шавкат Мирзиёев томонидан 24 декабрда тасдиқланган - 2019 йилда Ўзбекистонда жамоат хавфсизлигини таъминлаш “Йўл харитаси”да айтилади.

Ҳужжат билан қуйидагиларни инобатга олган ҳолда ички ишлар органлари ходимларини ижтимоий-ҳуқуқий жиҳатдан қўллаб-қувватлаш тизимини такомиллаштириш бўйича президент қарори лойиҳаси тайёрланади:

- терроризм ва жиноятчиликка қарши курашиш ҳамда жамоат хавфсизлигини таъминлаш жараёнида ҳалок бўлган ёки жароҳат олиб ногирон бўлиб қолган ходимларнинг фарзандларини республикадаги олий ўқув юртларига кириш имтиҳонларисиз қабул қилиш тартибини жорий этиш;

- республикадаги олий ўқув юртларига киришда ҳуқуқбузарликлар профилактикаси ва жиноятчиликка қарши курашишга муносиб ҳисса қўшган, хизмат ёки илмий фаолиятда юқори натижаларга эришган ходимларнинг фарзандларига имтиёзлар (қабул квоталари) бериш;

- ички ишлар органларининг қонуний талабларини бажармаслик ёки хизмат бурчини бажаришга тўсқинлик қилганлиги учун жавобгарликни кучайтириш.

Амалга ошириш муддати - 2019 йил январь. Масъул ижрочилар - ИИВ (Хатамов), ОТВ (Мажидов), Молия вазирлиги (Ҳайдаров).