Жиззахлик абитуриент Даврон Турсунов кириш имтиҳонида ўзининг талабага айланишига тўсиқ бўлган хатолик туфайли Давлат тест марказини судга бериб, бу судда ютиб чиқди.
Самарқанд тиббиёт институти қошидаги 1-сонли академик лицейда таҳсил олган Даврон Улуғбек ўғли Турсунов 2018 йилнинг ёзида Тошкент тиббиёт педиатрия институтига ҳужжат топшириб, август ойида имтиҳонга кирганди.
У синов натижалари бўйича 136,4 балл тўплаган, кириш балли эса 138,8 бўлгани туфайли талабаликка қабул қилинмаган. Шундан сўнг, у Давлат тест марказининг апелляция комиссиясига шикоят билан мурожаат қилган. Даврон Турсунов саволлар китобининг биология фани бўйича берилган 57-саволи юзасидан эътироз билдирган.
Савол мазмуни эса қуйидагича: «озиқ занжирида видра (йиртқич ҳайвон), балиқлар, қисқичбақасимонлар ва сув ўтлари бор. Учинчи тартиб консументларининг биомассасаси 32 кг бўлса, озиқ занжири барча компонентлари истеъмол қилган озиқнинг умумий биомассасини (кг) аниқланг».
А) 35520
В) 28000
С) 35552
D) 12832
Даврон Турсунов «А» вариантни тўғри деб ҳисобласа, Вазирлар Маҳкамаси ҳузуридаги Давлат тест маркази эса «C» вариантни тўғри деб ҳисоблаган.
Шундан сўнг, Даврон Турсунов Юнусобод туман маъмурий судига Давлат тест маркази мансабдор шахсларининг хатти-ҳаракатлари устидан шикоят қилади. Маъмурий иш 2018 йилнинг 10 декабрь куни Тошкент шаҳар Юнусобод маъмурий суди судьяси С.Кучкаров раислигида аризачи, унинг адвокати Б.Хамроқулов ва Давлат тест маркази вакиллари ишни кўриб чиқилади.
Суд томонидан аризачининг важларини текшириш мақсадида мутахассислар жалб қилинади. Уларнинг аксарияти абитуриент томонидан берилган жавоб тўғрилигини маълум қилишади.
Шунингдек, аризачининг адвокати судгача бир нечта олий таълим муассасаларига сўровнома юборган. Абу Али Ибн Сино номидаги Бухоро давлат тиббиёт институти, Мирзо Улуғбек номидаги Ўзбекистон Миллий университети, Навоий давлат педагогика институти, Самарқанд давлат тиббиёт институти, Самарқанд давлат университети, Гулистон давлат университети, Тошкент тиббиёт академияси Урганч филиали, Муқимий номидаги Қўқон давлат педагогика институти, Тошкент тиббиёт академияси Фарғона филиали, Бухоро давлат университети, Фарғона давлат университети, Наманган давлат университети, Тошкент давлат аграр университети Нукус филиали, Қарши давлат университети, Бердақ номидаги Қорақалпоғистон давлат университети, Урганч давлат университети ва бошқа олий ўқув юртлари шундай жавоб берган: озиқ занжирида видра (йиртқич ҳайвон), балиқлар, қисқичбақасимонлар ва сувўтлар бор. Учинчи тартиб консументларининг биомассаси 32 кг бўлса, озиқ занжири барча компонентлари истеъмол қилган озиқнинг умумий биомассаси 35520 кг.ни ташкил қилади.
