Назарбоев, Бердимуҳамедов, Жээнбеков ва Эрдўған Ўзбекистон президентини табриклади
|13:39 / 30.08.201917 7668 мин
Фото: Қирғизистон президенти матбуот хизматиФото: Қирғизистон президенти матбуот хизмати
Ўзбекистон Республикаси Президенти Шавкат Мирзиёев номига хорижий давлатлар ва ҳукуматлар, халқаро ташкилотлар раҳбарларидан мамлакат мустақиллигининг йигирма саккиз йиллиги муносабати билан байрам қутловлари келмоқда. Бу ҳақда давлат раҳбари матбуот хизмати хабар берди.
Қозоғистон Республикасининг биринчи президенти – Элбоши Нурсултон Назарбоев шундай ёзади:
“Ўзбекистон Республикасининг миллий байрами – Мустақиллик куни билан чин юракдан табриклайман!
Тарихан қисқа даврда Ўзбекистон сиёсий ва ижтимоий-иқтисодий соҳаларда улкан муваффақиятларга эришди ҳамда халқаро майдонда ўз нуфузини мустаҳкамлади.
Қозоғистон ва Ўзбекистон ўртасидаги муносабатларни юксак баҳолаб, бу ҳамкорлик бундан буён ҳам халқларимиз фаровонлиги йўлида ривожланишига ишонч билдираман.
Мамлакатларимиз ўртасидаги дўстлик ва ишонч муносабатларини алоҳида қадрлайман ҳамда улар мустаҳкамланиб боришига умид қиламан.
Фурсатдан фойдаланиб, Сизга, муҳтарам Шавкат Миромонович, мустаҳкам соғлик, масъулиятли фаолиятингизга катта зафарлар, қардош Ўзбекистон халқига эса тинч-фаровон ҳаёт ва равнақ тилайман.”.
Қозоғистон Республикаси президенти Қасим-Жомарт Тоқаев:
“Ўзбекистон Республикаси Мустақиллиги куни муносабати билан самимий табрикларим ва эзгу тилакларимни қабул қилгайсиз.
Мустақиллик йилларида мамлакатингиз муҳим янгиланишлар йўлини босиб ўтиб, давлат қурилишида, халқ фаровонлигини ошириш ва мамлакатнинг халқаро нуфузини мустаҳкамлаш борасида катта муваффақиятларга эришди.
Кўп асрлик дўстлик ва муштарак тарихга асосланган Қозоғистон-Ўзбекистон мулоқоти изчил ривожланиб бораётганини катта мамнуният билан қайд этмоқчиман. Ўйлайманки, бундай мулоқот давлатлар ўртасида самарали ўзаро муносабатларни йўлга қўйишда бошқалар учун ибратдир.
Биргаликдаги саъй-ҳаракатларимиз қардош мамлакатларимиз ўртасидаги кўп қиррали стратегик шерикликни янада кенгайтиришда муваффақият кафолати бўлади.
Сизга, муҳтарам Шавкат Миромонович, давлат раҳбари сифатидаги фаолиятингизда янги зафарлар, қардош Ўзбекистон халқига эса бахт-саодат ва равнақ тилайман!”.
Мавзуга оид
Шунингдек, Туркманистон президенти Гурбангули Бердимухамедовнинг қутлови:
“Мустақиллик куни муносабати билан Сизга ва Сиз орқали қардош Ўзбекистон халқига Туркманистон халқи ва ҳукумати номидан ҳамда шахсан ўз номимдан самимий табриклар ва энг эзгу тилакларни йўллаш менга шараф бағишлайди.
Мустақиллик йилларида биродар Ўзбекистон давлатчиликни мустаҳкамлаш, халқ фаровонлигини юксалтириш ва мамлакатнинг халқаро майдондаги нуфузини ошириш йўлида салмоқли муваффақиятларга эришди.
Яхши қўшничилик, дўстлик ва ўзаро англашув тамойилларига асосланган Туркманистон-Ўзбекистон муносабатлари халқларимиз фаровонлиги йўлида янада ривожланиши ва мустаҳкамланишига қатъий ишонаман.
Ушбу шукуҳли имкониятдан фойдаланиб, Сизга, муҳтарам Шавкат Миромонович, мустаҳкам соғлик ва бахт-саодат, қардош Ўзбекистон халқига эса тинчлик, фаровонлик ва равнақ тилайман.”.
Тожикистон Республикаси президенти Имомали Раҳмон:
“Катта мамнуният ила Тожикистон халқи номидан ва шахсан ўз номимдан Сизга ва биродар Ўзбекистон халқига юртингиз миллий байрами – Мустақиллик куни билан самимий ва қизғин табрик йўллайман.
Ўзбекистон Республикаси ўз тараққиётида оғишмай олға бораётгани, ижтимоий-иқтисодий ва маънавий ҳаётнинг турли соҳаларида улкан, ҳайратланарли натижаларга эришганини мамнуният билан таъкидлаш жоиз. Шунингдек, Ўзбекистоннинг, жумладан ўзаро ишонч ва ҳурмат тамойилларига асосланган конструктив минтақавий ҳамкорлик сиёсатини фаол амалга ошираётган давлат сифатида халқаро нуфузи ортмоқда.
Тожикистон ва Ўзбекистонни дўстлик, яхши қўшничилик ва эзгу мулоқотдан иборат бой тарихий анъаналар боғлаб туради.
Яқин қўшни бўлган халқларимиз муносабатларининг бунёдкор асосларини ҳар томонлама мустаҳкамлаш бугун ҳам Тожикистон ташқи сиёсатининг устувор йўналишлари орасида асосий ўринни эгаллайди.
Биргаликдаги саъй-ҳаракатларимиз туфайли давлатлараро шериклик ва барча даражадаги мулоқот муваффақиятли кенгаймоқда.
Ғоят натижадор тарзда ривожланиб бораётган, азалдан дўстона муносабатларимиз кейинги йилларда янада кенг тус олди, уларнинг стратегик шериклик даражасига кўтарилгани бунинг яққол мисолидир.
Мамлакатларимиз ҳамкорлигини сифат жиҳатдан янги ўзанга буриш учун зарур шарт-шароитлар яратишда Сизнинг, муҳтарам Шавкат Миромонович, шахсан улкан ҳиссангизни алоҳида қайд этмоқчиман.
Ишончим комил, биз биргаликда икки томонлама муносабатларимиздаги улкан салоҳиятни ишга солиб, стратегик шериклигимизни янада мустаҳкамлаймиз.
Сизга, муҳтарам Шавкат Миромонович, мустаҳкам соғлик, барча ишларингизга муваффақиятлар, дўст ва биродар Ўзбекистон халқига эса мусаффо осмон, тинчлик-осойишталик ва янада ривож тилайман.”.
Қирғизистон Республикаси президенти Сооронбай Жээнбеков:
“Қирғизистон халқи номидан ва шахсан ўз номимдан Сизни ва бутун Ўзбекистон Республикаси халқини Мустақиллик куни билан муборакбод этаман!
Сизнинг оқилона раҳбарлигингизда минтақавий ва халқаро ҳамкорлик борасида қилинган қатъий қадамлар туфайли Ўзбекистон Республикаси жаҳонда муносиб ўрин эгаллади.
Бугун мамлакатларимиз ҳамкорлиги мисли кўрилмаган даражага кўтарилди. Қирғизистон Республикаси ва Ўзбекистон Республикаси ўртасидаги стратегик шериклик, дўстлик ва яхши қўшничилик муносабатлари халқларимиз ёрқин келажаги йўлида бундан буён ҳам ривожланиши ва мустаҳкамланиб боришига ишонаман.
Фурсатдан фойдаланиб, Сизга, муҳтарам Шавкат Миромонович, мустаҳкам соғлик, давлат раҳбари сифатидаги фаолиятингизда муваффақиятлар, қардош Ўзбекистон халқига эса янада равнақ тилайман.”.
Туркия Республикаси президенти Ражаб Тоййиб Эрдўған:
“Ўзбекистон Мустақиллиги куни муносабати билан Сиз Жаноби Олийларини ва тимсолингизда бутун Ўзбекистон халқини шахсан ўзим ва халқим номидан самимий муборакбод этаман.
Дўст ва қардош Ўзбекистон мустақилликка эришганидан буён ўтган вақт мобайнида стратегик шериклик даражасига етган муносабатларимизни муштарак саъй-ҳаракатлар билан ҳар соҳада янада чуқурлаштиришимизга чин юракдан ишонаман.
Стратегик ҳамкорлик олий кенгашининг биринчи йиғилиши ўтказилиши муносабати билан Сизни ва делегациянгизни юртимизда қутлашдан мамнуният туйишимизни билдирмоқчиман.
Шу фурсатдан фойдаланиб, Сиз Жаноби Олийларига сиҳат-саломатлик, бахт-саодат, дўст ва қардош Ўзбекистон халқига омонлик тилаб қоламан.”.
Корея Республикаси президенти Мун Чже Ин:
“Сизни ва Ўзбекистон халқини мамлакатингиз мустақиллигининг 28 йиллиги билан чин юракдан муборакбод этаман.
Ўзбекистон мустақилликка эришганидан сўнг ички ва ташқи сиёсатда, иқтисодиёт ва ижтимоий соҳада қўлга киритган улкан муваффақиятлар катта ҳурмат-эътиборга сазовор.
Сиз Жаноби Олийлари томонидан амалга оширилаётган сиёсий ислоҳотлар мамлакатда ҳам, унинг ташқарисида ҳам юксак эътироф этилаётганини алоҳида таъкидламоқчиман.
Ишонаманки, Сизнинг раҳбарлигингизда Ўзбекистон Республикаси мамлакат ва жамиятни ривожлантиришда юқори натижаларга эришишда давом этади.
Ўйлайманки, менинг жорий йил апрель ойида Ўзбекистонга амалга оширган давлат ташрифим мамлакатларимиз илиқ биродар алоқалар билан боғланганини яна бир бор тасдиқлади. Шу муносабат билан янги, алоҳида стратегик шериклик даражасига кўтарилган икки томонлама муносабатларни сифатли ривожлантириш учун яқин ҳамкорликни давом эттирамиз, деб умид қиламан.
Жаноби Олийлари, Сизга мустаҳкам соғлик ва муваффақият, Ўзбекистон Республикаси халқига эса узлуксиз равнақ тилайман.”.
Қайд этилишича, қутловлар келиши давом этмоқда.
Бундан олдин, Владимир Путин ва Дональд Трамп Шавкат Мирзиёевга қутлов йўллаганди.
