Валютага дахлдор 70га яқин қонуности ҳужжатлари қайта кўриб чиқилади

Бу ҳақда Марказий банк раиси ўринбосари Бобур Абубакиров маълум қилди, деб хабар бермоқда Kun.uz мухбири.

«Мақсад – битта ягона ҳужжат қилиш, яъни валюта амалиётларини амалга ошириш тартиби. У катта ҳужжат бўлади. Ҳужжат чет эл валютасини банкка топширишдан, ҳисоб рақамининг юритилишидан тортиб хорижий валютани сотиб олиш, сотиш тартибигача бўлган оралиқдаги барча меъёрларни ўз ичига олади», – деди Абубакиров чоршанба куни бўлиб ўтган матбуот анжуманида.

Регулятор расмийсига кўра, қатор ҳукумат қарорлари ҳам ўз кучини йўқотади. Жумладан, хорижий валютани сотиш ва сотиб олиш тартиби бунга қадар Вазирлар Маҳкамасининг 2001 йилдаги 294-қарори билан белгиланган бўлиб, эндиликда бу қарор бекор қилинади ва Марказий банкнинг ички меъёрий ҳужжати қабул қилинади.

«Вазирлар Маҳкамасининг яна бошқа қатор қарорлари бор. Чет элда ҳисобварақасини очиш билан боғлиқ масалалар бор, рухсатнома талаб этилиши ёки хорижий валютани Ўзбекистон Республикасига олиб кириш, олиб чиқиш билан боғлиқ масалалар. Уларни айтиб ўтсам, жуда ҳам кўп.

Қарийб 70га яқин ҳужжат қайта кўриб чиқилиб, уларга тегишли ўзгартиш ва қўшимчалар киритилиш, айримларини бекор қилиш ҳақида таклифлар тайёрланиб, белгиланган муддатларда Вазирлар Маҳкамасига киритилади», – деди Бобур Абубакиров.

Эслатиб ўтамиз, бундан олдин Марказий банк раиси ўринбосари «қора бозор»га қандай барҳам бериш мумкинлигини айтгани хабар қилинган эди.