Курдлар Туркияни тақиқланган кимёвий қурол ва оқ фосфор қўллашда айблади 

Курдларнинг “Сурия демократик кенгаши” вакиласи Илҳом Аҳмад Вашингтонга ташрифи доирасида АҚШ конгрессменлари ва сенаторлари билан ўтган учрашувда Туркияни “Тинчлик булоғи” амалиёти вақтида тақиқланган қуролларни қўллашда айблади.

Rudaw агентлигининг хабар беришича, Аҳмад турк ҳарбийлари Сурия шимолида халқаро конвенциялар билан тақиқланган кимёвий қурол ва оқ фосфор қўллаётганини таъкидлаб ўтган. У бунинг исботи сифатида фосфордан куйишга хос жароҳатлар олган бола суратини кўрсатган.  

Шу билан бирга, Аҳмаднинг таъкидлашича, Туркия томонида жанг қилаётган мухолифат жангчилари эгаллаб олинган курд ҳудудларида тинч аҳолига қаттиққўллик қилмоқда, жумладан асирларни отиб ташламоқда.  

Туркия армияси Сурия шимолида оқ фосфор қўллаётгани ҳақидаги хабарлар 17 октябрда олинган. Ушбу қурол қўлланиши оқибатида жабрланганлар Рас-ал-Айн шаҳри шифохоналарига етказилганлари таъкидланган.  

Бироқ турк ҳарбийлари оқ фосфор ёки кимёвий қурол қўллашганини қатъиян рад этишган. Анқарада бундай воситаларга эга эмасликлари таъкидланган. 

Шунингдек, Туркия томонидан тақиқланган қурол қўлланганини мустақил томонлар тасдиқламаган.