Тошкент шаҳар ҳокимлиги қошидаги жамоатчилик кенгаши ўз ишини давом эттиради

Тошкент шаҳар ҳокимлиги қошидаги жамоатчилик кенгаши ўз ишини давом эттиради. Бу ҳақда пойтахт ҳокимлиги хабар берди.

Жамоатчилик кенгаши июнь ойида ўз ишини вақтинча тўхтатган эди. 8 ноябрь куни Диёр Мирзааҳмедов раислигида кенгаш яна йиғилган. Биринчи йиғилиш ташкилий-ахборот тарзида ўтказилди. 

“Янгиланган кенгашнинг иши шаҳар учун фойдали бўлган аниқ лойиҳаларни ишлаб чиқиш ҳамда ҳокимият фаолиятининг турли йўналишларида экспертлик кўмагини беришга йўналтирилади. Биринчи йиғилишда техник жараён масалалари муҳокама қилинди – комиссиялар таркиби, жамоат кенгашига аъзо бўлиш/аъзоликдан чиқиш регламенти ва бошқа жорий масалалар кўриб чиқилди”, - дейилади хабарда.

Эслатиб ўтамиз, жорий йилнинг июль ойи охирида тадбиркор Ҳикмат Абдураҳмонов Тошкент шаҳар ҳокимлиги ҳузуридаги Жамоатчилик кенгаши раиси лавозимидан кетганди.