Бухоро вилояти туманлари тадбиркорликнинг қайси йўналишларига ихтисослаштирилмоқда?

Президент Шавкат Мирзиёев томонидан 7 ноябрь куни тадбиркорлик ва кичик бизнесни жойларда янада ривожлантириш учун қўшимча имкониятларни аниқлаш ва ишга солиш бўйича кўрилаётган чоралар самарадорлиги ҳамда бу борадаги долзарб вазифаларга бағишланган видеоселектор йиғилиши ўтказилган эди.

Президент ушбу йиғилишда «Бундан буён тараққиёт ва фаровонликка фақатгина тадбиркорликни ривожлантириш ва қўллаб-қувватлаш орқали эришиш мумкин», деган фикрни илгари суриб, ҳокимлар, сектор раҳбарларига тадбиркорларга мурожаат билан чиқиш топшириғини берган эди.

Бухоро вилояти ҳокими Ўктам Барноев вилоят телевидениеси орқали чиқиш қилиб, тадбиркорларга мурожаат йўллади.

«Тадбиркорлик — мамлакатимиз иқтисодиётининг юксалиши, аҳоли учун иш ўринларининг яратилиши, сифатли маҳсулот ишлаб чиқариш, экспорт, давлат бюджет даромадларининг ошиши, манфаатдорлик орқали турмуш фаровонлигининг ўсиши, демакдир.

Бироқ шунга қарамасдан тадбиркорликни янада ривожлантиришда барча тўсиқ ва ғовларга тўлиқ барҳам берилмаган. Жойларда ҳокимликлар, давлат органлари идоралари иқтисодиётимизнинг ушбу муҳим йўналишига етарли эътибор бермаяптилар. Айрим ҳолларда бу ишга панжа орасидан қараб келинаётганлиги ташаббускор юртдошларимизнинг ҳақли эътирозларига сабаб бўлмоқда. Айниқса, тадбиркорларга ер, бино ва иншоот, кредит ажратиш, хом-ашё билан таъминлаш, коммуникация тизимларига уланишга рухсатнома беришда бюрократия кучлилик қилмоқда. Энг пастки бўғинда ишловчи давлат идораларининг айрим ходимлари мавжуд қонунчиликни назар-писанд қилмай, очиқ айтишимиз керакки, тамагирлик йўли билан муаммоларни ҳал қилишга атайин тўсиқ бўлишмоқда», – деди Барноев ўз мурожаатида.

«Қишлоқ хўжалигида янги йўналиш сифатида бугун пахтачиликда синовдан муваффақиятли ўтган кластер тизими бошқа тармоқларга ҳам жорий этилади. Хусусан, вилоятда 2020 йилда 9та ғаллачилик, 6та паррандачилик, 4та чорвачилик, 3та пиллачилик ва 6та мева-сабзавотчилик кластерларини ташкил этиш кўзда тутилган. Бунинг учун 5,5 минг гектар ер майдонлари ажратилади», – дейди Бухоро вилояти ҳокими.

7 ноябрдаги йиғилишда президент Шавкат Мирзиёев томонидан ҳар бир ҳудуднинг хусусияти, салоҳияти, ихтисослашувидан келиб чиқиб, аҳолини тадбиркорликка кенг жалб этиш, уларнинг бизнес ғояларини ҳар томонлама қўллаб-қувватлаш тизимини такомиллаштириш бўйича топшириқ берилган эди.

Ушбу топшириқни бажариш юзасидан 2020 йилда:

• Бухоро шаҳри – туризм, тўқимачилик ва тикув-трикотаж, фармацевтика, заргарлик саноати, сут ва гўшт маҳсулотлари ишлаб чиқариш;
• Когон шаҳри – қурилиш материаллари ишлаб чиқариш, сутни қайта ишлаш; 
• Олот тумани – тўқимачилик ва тикув-трикотаж саноати, балиқчилик кластери;
• Бухоро тумани – мева-сабзавотни қайта ишлаш, тўқимачилик ва тикув-трикотаж саноати, узумчилик, иссиқхоналар фаолиятини ташкил этиш;
• Вобкент тумани – ипакдан тайёр маҳсулотлар ишлаб чиқариш, чорвачилик, мева-сабзавотни қайта ишлаш, балиқчилик;
• Ғиждувон тумани – чарм-пойабзал, тўқимачилик ва тикув-трикотаж саноати, қурилиш материаллари ишлаб чиқариш, чорвачилик, балиқчилик;
• Жондор тумани – иссиқхоналар фаолиятини ташкил этиш, мева-сабзавотни қайта ишлаш, паррандачилик кластерини ташкил этиш, чорвачилик, тўқимачилик ва тикув-трикотаж саноати;
• Когон тумани – сут маҳсулотлари, қурилиш материаллари ишлаб чиқариш,  балиқчилик, паррандачилик саноати;
• Қоракўл тумани – чорвачилик, тери ва жунни қайта ишлаш, тўқимачилик ва тикув-трикотаж саноати;
• Пешкў тумани – қурилиш материаллари ишлаб чиқариш, балиқчилик, чорвачилик, асаларичилик;
• Ромитан тумани – анорчилик кластери, тўқимачилик ва тикув-трикотаж саноати, иссиқхоналар фаолиятини ташкил этиш, экотуризм;
• Шофиркон тумани – чорвачилик, қурилиш материаллари ишлаб чиқариш, тўқимачилик ва тикув-трикотаж саноати, узумчилик;
• Қоровулбозор тумани – паррандачилик, чорвачилик ҳамда гўшт ва сутни қайта ишлаш, қурилиш материаллари ишлаб чиқаришга ихтисослаштирилади.

Маълумот учун, Вазирлар Маҳкамасининг 2019 йил 21 сентябрдаги қарори билан Қоракўл, Ромитан, Пешкў, Шофиркон, Вобкент, Бухоро ва Олот туманларидаги давлатга тегишли бўш турган ва фойдаланилмаётган жами 31,6 гектар ер майдонлари негизида кичик саноат зоналари ташкил этилиши белгиланган.