Ўзбекистон Мустақиллигининг 35 йиллиги арафасида президент Шавкат Мирзиёев умумий қиймати қарийб 50 триллион сўмликни объектларни ишга туширди. Тантанали маросимда телекўприк орқали давлат раҳбари билан мулоқот қилган Бухоро вилояти ҳокими Ботир Зарипов Бухоро тарихида ҳозиргидек ривожланиш ҳеч қачон бўлмаганини айтди.
“Рухсат берсангиз, мен ҳам озгина иқтисодий рақамларга тўхталсам. Мана, бу ерда тарихчилар, оқсоқоллар ўтирибди, Бухоронинг 2500 йиллик тарихини кўтарганда ҳам бугунги кундагидек ривожланиш бўлмаган, ҳурматли президент.
Тарихий обидаларни тиклаш учун маблағлар ажратганлигингиз, Мир Араб, Арк, Минорайи калон каби халқимизнинг дурдоналарини сақлаш бўйича маблағлар ажратиб... Бугунги кунда бутун дунё лол қоляпти, чет эллардан келган туристлар ҳам мана шуларни қайта реставрация бўлиб тикланганини кўриб ҳайрон қолишяпти, ҳурматли президент”, – деди вилоят раҳбари.
Ботир Зарипов йил якунигача Бухоро вилоятида камбағаллик ва ишсизликка барҳам беришга ваъда берди.
“Сизнинг ислоҳотларингиз натижасида биз ялпи ҳудудий маҳсулотимизни 10 фоизга ошириш бўйича ўзимизга мажбуриятни олдик. 12 триллион сўм кредит ресурсларини бердингиз. Нима етмайди деган саволни бердингиз. Мен тан олиб айтдим, ҳурматли президент, фақат биз ҳокимлар бошчилигида, пастга тушиб, камбағаллик ва ишсизликни нол қилиш бўйича сиз яратиб берган имконият, имтиёз, шароитлардан фойдаланиб, бемалол имконияти бор: Бухорода йил якунигача камбағаллик, ишсизлик бўлмайди, ҳурматли президент”, – деди у.
Президент Шавкат Мирзиёев эришилган юксак натижаларни эътироф этиш билан бирга, ҳали қилинадиган ишлар кўплигини таъкидлади.
“Бу – жуда катта марра. Бир пайтлар Бухорода [фақат] томга пахта экилмаган эди. Сув йўқ эди, йўл йўқ эди. Биринчилар бўлиб сувга қанча пул бердик, йўлга қанча пул бердик. Буни тушунган одам тушунади. Бир нарсани билишимиз керак: албатта, эришган натижаларимиз юксак ва улар бизники, лекин ҳали ишларимиз жуда кўп”, – деди давлат раҳбари.
