АҚШ авиакомпанияси 50 та Airbus самолётига буюртма берди

АҚШнинг United Airlines авиакомпанияси Airbus компаниясининг A321XLR моделидаги 50 самолётини харид қилишга буюртма берди. Хариднинг умумий қиймати 7 млрд долларни ташкил қилади. Бу ҳақда Bloomberg ахборот агентлиги хабар берди. 

Янги самолётлар 15 йил аввал ишлаб чиқарилиши тўхтатилган Boeing 757-200 самолётлари ўрнини эгаллайди. Айни вақтда АҚШ авиакомпанияси 75 та шундай самолётдан фойдаланади. Уларни Boeing 757-200 MAX самолётлари билан алмаштириш кўзда тутилганди, бироқ Boeing 737 МАХ самолётлари Индонезия ва Эфиопияда ҳалокатга учрагандан кейин Boeing’да юзага келган муаммолар сабабли авиакомпания бошқа ечим излашига тўғри келган. 

Таъкидланишича, авиакомпания A321XLR’ларни 2024 йилдан харид қила бошлайди. 

United Airlines вице-президенти Эндрю Носелланинг таъкидлашича, янги самолётлар авиакомпанияга йўналишлар тармоғини кенгайтиришга имкон беради. 

A321XLR модели A321neo’нинг охирги модификацияси бўлиб, аввалги авлоддаги моделларга нисбатан 30 фоиз камроқ ёқилғи сарфлайди. У, шунингдек, тор фюзеляжли самолётлар учун рекорд узоқликка учиши (8,7 минг километр) билан ажралиб туради. Жумладан, самолёт АҚШнинг шарқий қисмидан Европага қўнишсиз парвозлар амалга оширишга имкон беради.