Молия вазирлигига янги функциялар юклатилади

Молиявий ҳисоботнинг халқаро стандартларига ўтишнинг қўшимча чора-тадбирлари қабул қилинади. Президентнинг тегишли қарори лойиҳаси муҳокама учун жойлаштирилди.

Қайд этилишича, қуйидагилар:

Ўзбекистон Республикасининг “Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги қонуни, Ўзбекистон Республикаси президентининг 2015 йил 24 апрелдаги ПФ-4720-сон “Акциядорлик жамиятларида замонавий корпоратив бошқарув услубларини жорий этиш чора-тадбирлари тўғрисида”ги фармони, Ўзбекистон Республикаси президентининг 2019 йил 3 мартдаги ПҚ-4265-сон “Кимё саноатини янада ислоҳ қилиш ва унинг инвестициявий жозибадорлигини ошириш чора-тадбирлари тўғрисида”ги қарори ва 2019 йил 17 январдаги ПҚ-4124-сон “Кон-металлургия тармоғи корхоналари фаолиятини янада такомиллаштириш чора-тадбирлари тўғрисида”ги қарорлари билан йиллик молиявий ҳисоботнинг молиявий ҳисоботнинг халқаро стандартлари (МҲХС)га мувофиқ эълон қилиниши ва уни Аудитнинг халқаро стандартлари (АХС) асосида ташқи аудитдан ўтказилиши назарда тутилган;

Ўзбекистон Республикаси Молия вазирлиги билан АССА (Аssociation of Chartered Certified Accountants) ўртасида ҳисоб, аудит ва бизнесни бошқариш соҳалари мутахассисларини халқаро стандартлар бўйича касбий ўқитишга, шунингдек нодавлат таълим муассасаларини ва олий таълим муассасаларининг ўқув дастурларини босқичма-босқич халқаро аккредитациядан ўтказишга кўмаклашиш тўғрисидаги Меморандумни имзолаш учун ишлар олиб борилган.

Ўзбекистон Республикаси Молия вазирлиги МҲХСни жорий этиш бўйича ваколатли орган этиб белгиланади ва унга қуйидаги функциялар юклатилади:

МҲХСни жорий этиш жараёнини, шунингдек хўжалик юритувчи субъектлар томонидан молиявий ҳисоботни МҲХСга мувофиқ ўз вақтида эълон қилишини мониторинг қилиш ва ушбу қарорда назарда тутилган талабларнинг бажарилиш натижадорлигини таҳлил қилиш;

МҲХС соҳасида мутахассисларни тайёрлашда жаҳоннинг илғор тажрибасини оммалаштириш ва Ўзбекистон Республикаси олий таълим муассасалари ва ўқув марказларини босқичма-босқич аккредитациядан ўтказиш бўйича бухгалтерия ҳисоби соҳасидаги халқаро ташкилотлар билан ўзаро ҳамкорликни кенгайтириш;

ўқув жараёнининг, имтиҳонларни ўтказиш ва улар натижаларини баҳолашнинг ҳамда сертификат беришнинг шаффофлигини таъминловчи жаҳоннинг илғор тажрибасини ва халқаро стандартларни ҳисобга олган ҳолда МҲХС бўйича сертификатлашнинг самарали тизимини ташкил этиш;

ўқув марказларида МҲХС бўйича талаб юқори бўлган мутахассисларни ўқитиш ва олий таълим муассасалари илмий-педагогик кадрларининг малакасини ошириш бўйича ташкилий тадбирларни ўтказишда ҳар тарафлама кўмаклашиш;

МҲХСни жорий этишнинг устувор йўналишларидан келиб чиққан ҳолда норматив-ҳуқуқий базани такомиллаштириш бўйича таклифлар киритиш.

Белгиланишича:

а) 2021 йилнинг 1 январидан бошлаб молиявий ҳисоботни ихтиёрий равишда МҲХСга мувофиқ тайёрловчи тадбиркорлик субъектлари бухгалтерия ҳисобининг миллий стандартлари бўйича молиявий ҳисоботни тақдим этишдан озод этилади;

б) акциядорлик жамиятлари, банклар, суғурта ташкилотлари, устав фондида давлат улуши бўлган хўжалик юритувчи субъектлар, йирик солиқ тўловчилар тоифасига киритилган юридик шахслар:

МҲХС асосида 2021 йилнинг 1 январидан бошлаб бухгалтерия ҳисобининг юритилишини ташкил этади ва 2021 йилнинг якунларидан бошлаб молиявий ҳисоботни тайёрлайди;

2021 йилнинг якунига қадар бухгалтерларни халқаро сертификатлаш доирасида МҲХС бўйича “Молиявий ҳисоб” ёки “Молиявий ҳисобот” фанларини муваффақиятли топширганлиги тўғрисидаги ҳужжатга ёхуд халқаро бухгалтер сертификатига (АССА ва унинг дипломлари, СРА, CIPA) эга бўлган уч нафар мутахассисдан кам бўлмаган миқдорда МҲХСни сифатли қўллаш учун етарли бўлган ходимлар сони билан таъминлайди.

Ўзбекистон Республикаси Олий ва ўрта махсус таълим вазирлиги белгиланган тартибда:

а) 2020 йилнинг 1 августига қадар бакалавриат ва магистратура таълим йўналишларининг “бухгалтерия ҳисоби” ва “аудит” мутахассисликлари бўйича МҲХСни чуқурроқ ўрганишни назарда тутувчи янгиланган ўқув дастурини тасдиқлайди ва белгиланган тартибда ўқув жараёнига жорий этади;

б) 2020 йилдан бошлаб тажриба олий таълим муассасаларининг ўқув дастурларини бухгалтерия ҳисоби соҳасида халқаро аккредитациядан ўтказиш ва кейинчалик мазкур тажриба лойиҳасини босқичма-босқич республикадаги бошқа олий таълим муассасаларига жорий этиш бўйича чора-тадбирлар қабул қилади.

Белгиланишича:

олий таълим муассасаларида 2022/2023 ўқув йилидан бошлаб бухгалтерия ҳисоби ва аудит фанларини ўқитиш фақат МҲХС бўйича “Молиявий ҳисоб” ёки “Молиявий ҳисобот” фанларини муваффақиятли топширганлиги тўғрисидаги ҳужжатга ёхуд халқаро бухгалтер сертификатига (АССА ва унинг дипломлари, СРА, CIPA) эга бўлган ўқитувчилар томонидан амалга оширилади;

“бухгалтерия ҳисоби” ва “аудит” йўналиши бўйича педагог кадрларни ўқув марказларида ўқитиш харажатлари олий таълим муассасаларининг бюджет ва бюджетдан ташқари маблағлари доирасида молиялаштирилади.