Туркиядаги авикомпания ходими Карлос Гонга ёрдам бермаса оиласига зарар етказиш билан таҳдид қилишганини айтди

Туркиядаги авиаташув хизмати кўрсатувчи MNG Jet компанияси ходими агарда у кейинроқ Nissan собиқ раҳбари Карлос Гон эканлиги маълум бўлган кишини мамлакатдан олиб чиқиб кетишга ёрдам кўрсатмаса, оиласига зарар етказиш билан таҳдид қилишганини айтди. Бу ҳақда IHA агентлиги хабар берди.

Агентликнинг маълумот беришича, MNG Jet амалиёт бўлимининг ҳибсга олинган бошлиғи Ўкан Кўсемен собиқ таниши унга таҳдид қилганини айтган.

"Байрутлик собиқ танишим менга қўнғироқ қилиб халқаро аҳамиятга молик иш борлигини, агарда ёрдам бермасам, хотиним ва боламга зарар етишини айтди. Мен қўрқиб кетдим. Мен аэропортга самолётда келтирилган кишини бошқа самолётга олиб ўтдим. Унинг кимлигини билмадим", - деган у.

Аввалроқ MNG Jet Гон Японияни тарк этганлиги тахмин қилинган самолёт йўловчилари рўйхатида унинг исми бўлмаганлигини билдирганди. Компаниянинг қайд этишича, унинг ходимларидан бири айрим маълумотларни сохталаштирганини тан олган.

Аввалроқ Туркияда Карлос Гоннинг Япониядан Ливанга Истанбул орқали қочиши бўйича қўзғатилган тергов иши доирасида етти киши ҳибсга олингани хабар қилинганди.

31 декабрь куни Франция, Бразилия ва Ливан фуқаролигига эга бўлган Гон Ливанга келгани маълум бўлганди.

ОАВ маълумотларига кўра, Карлос Гон Японияни 30 декабрда тарк этишга муваффақ бўлган. Унинг Токиодаги уйига ёлланма шахслар гуруҳи янги йил билан табриклаш баҳонасида мусиқачилар кўринишида кириб, уни мусиқа асбоби ғилофида олиб чиқиб кетишган. Япония хавфсизлик ходимлари шубҳали ҳеч нарса сезишмаган.  

Сўнгра Гон кичикроқ аэропортга олиб борилиб, у ердан Туркияга, сўнгра хусусий самолётда Ливанга учиб кетган.  

Японияда молиявий фирибгарликларда айбланган Гон 2018 йил кузида ҳибсга олиниб, 2019 йил мартида гаров пули эвазига озодликка чиқарилган. Унга Японияни тарк этиш ва рафиқаси билан мулоқот қилиш тақиқланган эди. У Японияда 80 млн долларлик даромадни яширишда айбланмоқда.