Шу билан биргаликда, инфекциядан зарарланиш ҳолатлари секинлашган, аммо экспертларнинг сўзларига кўра, эпидемия ўзининг юқори чўққисига етиб ортга қайтаётгани ҳақида гапиришга ҳали эрта.
Эпидемия ўчоғи бўлган Хитойнинг Хубэй провинциясида ҳалок бўлганлар сони 780 кишига етган.
Жами ўлимлар сони эса 910 нафарни ташкил қилмоқда. Икки ўлимдан ташқари (Филиппин ва Ҳонгконг) барча ўлимлар Хитойнинг материкдаги қисмида қайд этилган.
2003 йилда 20дан ортиқ давлатда SARS эпидемияси (оғир ўткир респиратор синдроми) оқибатида ҳалок бўлганлар сони 774 нафарни ташкил этган.
Шунингдек, янги коронавирус бир ойдан сал кўпроқ вақт ичида 2012 йилдан бери Яқин Шарқ респиратор синдромидан (MERS-CoV) вафот этганлардан кўпроқ одам ҳаётдан олиб кетди.
MERS коронавируси илк бор 2012 йилда Саудия Арабистонида аниқланган. 2012 сентябрдан дунёнинг 27 давлатида MERS билан 2494та касалланиш ҳолати қайд этилган, ундан 858 киши вафот этган.
Вақтинчалик NCP номини олган янги турдаги коронавирус 40171 кишида аниқланган. 190 мингдан ортиқ хитойлик тиббиётчилар назорати остида.
«Янги турдаги касалликка вақтинча «янги турдаги коронавирус келтириб чиқарувчи зотилжам» номини беришга қарор қилинди. Унинг инглиз тилидаги номланиши Novel Coronavirus Pneumonia бўлиб, қисқартмаси NCP шаклида», дейилади Хитой соғлиқни сақлаш давлат қўмитаси баёнотида.
Жаҳон соғлиқни сақлаш ташкилотида ҳозирча унга халқаро ном берилмаган. ЖССТ январь ойи охирида коронавирус тарқалишини жаҳон миқёсидаги фавқулодда ҳолат деб эълон қилганди.
