Африкада коронавирусдан касалланишнинг илк ҳолати қайд этилди. Пекинга келувчилар 2 ҳафталик карантинда бўлади

Мисрда янги коронавирусдан касалланишнинг илк ҳолати аниқланди. Миср ушбу вирус аниқланган Африканинг биринчи давлати бўлди.

Бу ҳақда Миср соғлиқни сақлаш вазирлиги баёнотига асосланиб Reuters ахборот агентлиги хабар берди. 

Таъкидланишича, вирус Мисрга келган хорижликда аниқланган. У қайси давлатдан келгани маълум қилинмаган.  

Вазирлик бу ҳақда Жаҳон соғлиқни сақлаш ташкилотини хабардор қилган. Миср соғлиқни сақлаш вазири коронавирусга қарши курашиш бўйича режани амалга ошириш масаласи бўйича йиғилиш ўтказган. У мамлакат расмийлари вирус тарқалиши олдини олиш бўйича чоралар кўраётганини қўшимча қилган. 

Айни вақтда коронавирусдан касалланиш ҳолатлари бир қатор давлатларда, жумладан Германия, Франция, Россия, Швеция, Финляндия, Бельгия, Испания, Италия, Канада, США, Япония, Тайван, Сингапур, Малайзия, Непал, Австралияда қайд қилинган.

Бу орада Хитой пойтахти Пекинда шаҳарга келувчилар учун икки ҳафталик мажбурий карантин киритилди.  

Қарорга кўра, Пекинни тарк этган кишилар унга қайтгандан кейин икки ҳафта уйларида кузатув остида қолиши ёки умумий карантин ҳудудига жойлаштирилиши керак бўлади. Худди шу қоида шаҳарга келувчи барча меҳмонларга ҳам амал қилади.

Ушбу чора ҳафта бошида таклиф қилинган ва пойтахт раҳбарияти томонидан муҳокама қилингач мақсадга мувофиқ деб топилган. Таъкидланишича, ушбу талабга амал қилмайдиганлар қонунга кўра жавобгарликка тортилади.