Икки бунёдкор бирлашуви: Murad Buildings ва BI Group ҳамкорлигига асос солинди – NRG!

Баҳорнинг илк куни Ўзбекистон бунёдкорлиги тарихи йирик ҳамкорлик билан ёдда қоладиган бўлди. Ўзбекистоннинг шиддат билан ривожланаётган Murad Buildings девелоперлик компанияси Қозоғистоннинг соҳа гигантларидан бири бўлган, йиллик айланма маблағи 1,5 млрд. АҚШ долларини ташкил қиладиган BI Group компанияси билан янги ва ўзига хос услубда ишловчи – NRG бунёдкорлик компаниясига асос солдилар.

Пойтахтнинг ҳашаматли Hilton меҳмонхонаси анжуманлар залида йирик байрам шаклида ташкиллаштирилган бу тақдимотда сиёсатчилар, йирик тадбиркорлар, шоу бизнес вакиллари ва кўплаб хорижий ҳамда маҳаллий меҳмонларни учратиш мумкин эди.

Тақдимот дастлабки сониялариданоқ мақсадларнинг нақадар улканлигини кўрсатиб бера олди. Murad Buildings асосчиси ва раҳбари Мурод Назаров ҳамда BI Group директорлар кенгаши раиси Ойдин Раҳимбоевлар янги ташкил қилинаётган NRG бунёдкорлик компаниясининг мақсад ва вазифалари ҳақида сўзлаб бердилар.

Маълумот учун: BI Group – Қозоғистоннинг йирик девелоперлик компанияси. Нафақат бу давлатда, балки қатор бошқа давлатларда ҳам фаолият юритади. 8 минг нафардан ортиқ ходимларга эга бу компания 25 йилдирки муваффақият билан ишлаб келмоқда ва шу даврга қадар 150 дан ортиқ лойиҳада 5 млн.кв.м.дан ортиқ турар-жой ва бизнес объектларини қуриб битқазган. Биргина 2019 йилнинг ўзида компания томонидан 1,5 млн. кв.м.дан ортиқ майдон фойдаланишга топширилган ва Мурод Назаровнинг билдиришича, бу кўрсаткич биздаги жами девелоперлик компаниялари ҳажмидан кўпроқдир. Компаниянинг йиллик айланмаси 1,5 млрд. АҚШ долларини ташкил қилади.

Тақдимотга ташриф буюрган BI Group холдинги бошқаруви раиси Омонгелди Омаровнинг маълум қилишича, компания бир вақтнинг ўзида 150 дан ортиқ объектларда фаолият олиб боради ва соҳага мўлжалланган махсус дастур орқали барчаси муттасил назорат қилиб борилади. Компания томонидан махсус яратилган “Smart ремонт” дастури уйларни нафақат қуришни, балки ички дизайни, таъмирлаш ва жиҳозлашни ҳам кўзда тутади. Айни мана шу дастур ўтган 5 ой давомида Қозоғистонда мингдан ортиқ, яъни ойига 200та хонадонни таъмирлаб, жиҳозлаб тайёр ҳолга келтириш имконини берган.

Янги ташкил қилинаётган NRG бунёдкорлик компаниясида ҳам айни мана шу етакчи жиҳатлардан фойдаланилади. Муҳими, янги лойиҳа Ўзбекистон қурилиш тизимида янги услубни йўлга қўяди ҳамда у қурилаётган объектларнинг сифатли ва арзон бўлишини таъминлашга хизмат қилади.

Шунингбек, икки компания ўзининг энг илғор сифатларини бирлаштириб, уйларнинг нафақат сифатли қурилиши, балки хавфсизлиги, келгусида экплуатация тизими бўйича ҳам тўлиқ жараённи қамраб олади.

Тадбир давомида Murad Buildings асосчиси Мурод Назаров билан қисқа суҳбат қилдик ва бу ҳамкорликнинг тамал тоши қандай қўйилганлиги билан қизиқдик:

– Ҳаммаси тасодифан бўлди, дўстона учрашувлар, спорт тадбирларидан бошланди. Ўзаро суҳбатлар давомида фикрларимиз нақадар муштараклигини, мақсадларимиз ўхшашлигини англаб етдик ва бир-биримизнинг кучли жиҳатларимизни ҳисобга олиб, ҳамкорликни йўлга қўйишга келишдик. Ўйлайманки Ўзбекистонда янги бренд остида йўлга қўяётган бу лойиҳамиз ҳаммамиз учун ҳам фойдали бўлади.

Тақдимотда қозоғистонлик тадбиркор, BI Group директорлар кенгаши раиси Ойдин Раҳимбоев ҳам Ўзбекистон бозорига кириб келиш сабаблари ҳақида гапирди:

– Биз Ўзбекистонни жадал ривожланаётган давлат сифатида биламиз. Мен мамлакатингизда янги лойиҳага қўл ураётганимиз ҳақида оилам аъзоларига айтганимда бундан отам жуда хурсанд бўлганди. Сабаби, отамнинг аждодлари ўзбекистонлик бўлишган ва бундан асрлар олдин Қозоғистонга кўчиб кетишган. Отамнинг шодлиги тарихий ватани билан алоқалар кучаяётганида эди.

Унинг сўзларига қўшимча қилган Мурод Назаров “Дастлаб ҳамкорлик таклиф қилишганида ўзим ҳам ҳайратда қолгандим. Чунки биз нисбатан кичик компаниямиз, улар жуда йирик. Аммо Ойдин бир вақтлар улар ҳам кичик компания бўлганини айтиб, кўнглимни кўтарди. Янги Ўзбекистоннинг тараққиётига хизмат қиладиган янги лойиҳаларни йўлга қўяётганимиздан мамнунмиз. Давлатимизга, президентимиз Шавкат Мирзиёевга тадбиркорлик учун яратилган шароитлар учун миннатдорлик билдираман” – деди.

NRG бунёдкорлик компаниясининг Ўзбекистондаги дастлабки лойиҳаси NRG Oybek кўп функцияли комплекси бўлади. Ўзбек шеъриятининг ёрқин намоёндаси ижодидан илҳомланиб яратилган бу лойиҳада ҳар икки компания истиқболининг уйғунлиги сезилиб туради.

Аброр Зоҳидов, тасвирчи Шерзод Эгамбердиев, Tashkent city.

Реклама ҳуқуқи асосида