Иқтисодиёт тармоқлари ва ижтимоий соҳани куз-қиш даврига тайёрлаш бўйича президент қарори қабул қилинади

Президентнинг “Республика иқтисодиёти тармоқлари ва ижтимоий соҳани 2020/2021 йиллар куз-қиш даврида барқарор ишлашга комплекс тайёрлашни таъминлаш чора-тадбирлари тўғрисида”ги қарори лойиҳаси муҳокама учун жойлаштирилди.

Қайд этилишича:

Ўзбекистон Республикаси Вазирлар Маҳкамаси қошида Иқтисодиёт тармоқлари, ижтимоий соҳа объектларини куз-қиш даврида барқарор ишлашга тайёрлаш, истеъмолчиларни электр энергияси, табиий ва суюлтирилган газ, кўмир маҳсулотлари билан узлуксиз таъминлаш жараёнининг боришини ўрганиш ва назорат қилиш, хусусий уй-жой мулкдорлари ширкатлари фаолиятини мувофиқлаштириш, иссиқлик энергияси ва ичимлик сув етказиб бериш бўйича республика штаби ташкил этилган;

республика иқтисодиёти тармоқларини 2019/2020 йиллар куз-қиш даврида барқарор ишлашга тайёрлаш бўйича бажарилган ишлар натижаларини танқидий таҳлил қилиш асосида ижтимоий инфратузилма, асосий турдаги ёқилғи-энергетика ресурсларини жамғариш, сектор, маҳалла ва барча кўп квартирали турар жой фонди бўйича аниқланган камчиликлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан бартараф этилган.

Қуйидагилар:

а) республика иқтисодиёти тармоқлари ва ижтимоий соҳани 2020/2021 йиллар куз-қиш даврида барқарор ишлашга тайёрлаш бўйича комплекс чора-тадбирлар режаси;

б) транспорт, коммуникациялар, қурилиш ва уй-жой коммунал хўжалиги масалалари бўйича ишчи гуруҳ таркиби;

в) асосий муҳандислик коммуникациялари ва технологик ускуналарни 2020/2021 йиллар куз-қиш даврида барқарор ишлашга тайёрлаш, хусусан, марказий ва маҳаллий қозонхоналар, иссиқлик ва ичимлик сув тармоқларида мукаммал ва жорий таъмирлаш ишлари асосий кўрсатгичлари;

г) кўп квартирали уй-жой фондини ҳудудлар бўйича 2020/2021 йиллар куз-қиш даврида барқарор ишлашга тайёрлаш мукаммал ва жорий таъмирлаш кўрсаткичлари тасдиқланади.

Транспорт, коммуникациялар, қурилиш ва уй-жой коммунал хўжалиги масалалари бўйича ишчи гуруҳ (О.Раматов)га:

вилоятлар, шаҳарлар ва айниқса қишлоқ туманларида кўп квартирали уйларни бўлажак куз-қиш даврида барқарор ишлашга тайёрлашни, маҳаллий автомобил йўллари, кўчалар ва умумий фойдаланиладиган жойлар, лифт ускуналари, марказлаштирилган ва маҳаллий қозонхоналар, иссиқлик, ичимлик сув ҳамда канализация тармоқлари ва маҳаллалар ҳудудларининг санитария ҳолати талабларига мувофиқ тартибга келтирилишини жойларга чиққан ҳолда назорат қилиш;

ўрганиш натижалари кўра объектларни куз-қиш даврига тайёрлаш учун масъул бўлган барча тузилмаларнинг фаолияти мувофиқлаштириш;

мавжуд муаммоларни ҳал қилиш ва аниқланган камчиликларни бартараф этиш, маҳаллий ижро этувчи ҳокимият органлари раҳбарларининг шахсий масъулиятини ошириш юзасидан зарур чора-тадбирлар кўриш топширилади.

Ёқилғи-энергетика соҳаси масалалари бўйича ишчи гуруҳ таркиби, 2020/2021 йиллар куз-қиш даврида иссиқлик таъминоти корхоналари учун кўмир, мазут ва техник туз тайёрлаш, шунингдек, аҳолига суюлтирилган газни ҳудудлар бўйича етказиб бериш топшириқлари, 2020/2021 йил куз-қиш даврида аҳоли хонадонларини ва ижтимоий соҳа объектларини кўмир ва кўмир брикети маҳсулотлари билан таъминлаш кўрсаткичлари тасдиқланади.

Ёқилғи-энергетика соҳаси масалалари бўйича ишчи гуруҳ (А.Султонов)га:

вилоятлар, шаҳарлар ва айниқса қишлоқ туманларида аҳолига суюлтирилган газ ва кўмир ёқилғиси билан таъминлаш, иссиқлик ва электр энергиясини ишлаб чиқувчи ташкилотларга ёқилғи ресурсларни узлуксиз етказиб бериш бўйича барча масалаларни тартибга келтирилишини жойларга чиққан ҳолда назорат қилиш;

трансформатор подстанцияларини таъмирлаш ҳамда уларнинг барқарор ишлашини таъминланиши, табиий ва суюлтирилган газ етказиб берилиши, кўмир маҳсулотларининг ғамланиши билан боғлик муаммоларни ўз вақтида ҳал қилиш ва камчиликларни бартараф этиш учун жойларга чиқиб, аҳоли билан учрашувлар ўтказиш;

2019/2020 йил куз-қиш мавсуми тажрибасидан келиб чиққан ҳолда автомобилларга газ тўлдириш компрессор шохобчалари билан тузиладиган шартнома лойиҳаларини ҳуқуқий жиҳатдан бугунги кунда ушбу объектларга қўйилаётган талаблардан келиб чиқиб, тубдан қайта кўриб чиқиш;

тадбиркорлик субъектлари ва аҳоли томонидан табиий газдан ноқонуний фойдаланиш, талон-торожлик ҳолатлари аниқланганда улар билан тузилган шартномаларни бир томонлама бекор қилиш механизмини жорий этиш топширилади.

“Ўзбекнефтгаз” АЖ (Абдуллаев), “Ҳудудий электр тармоқлари” АЖ (Мустафоев), “Ўзтрансгаз” АЖ (Саидов), “Ҳудудгазтаъминот” АЖ (Эшмуродов), “Ўзбеккўмир” АЖ (Одилов) раҳбарлари асосий ёқилғи-энергетика ресурслари ва кўмир маҳсулотлари барча тоифадаги истеъмолчиларга ўз вақтида етказиб берилиши бўйича тадбирларни сўзсиз бажарилиши учун шахсан масъул эканлиги белгилаб қўйилади.

Ҳудудлардаги шифохоналар ва тиббиёт пунктларини ҳамда уларга хизмат кўрсатувчи қозонхоналар, сув иншоотлари ҳамда насос станцияларини узлуксиз электр энергияси ва табиий газ билан таъминлаш чоралари кўрилади.

Бунда, тиббиёт муассасаларини таъминловчи электр узатиш ва газ таъминоти тармоқларида чекловлар учун энергоресусрлардан узиб қўйиш ҳолатлари тақиқлаб қўйилади ва ўрганиш натижалари бўйича объектларни куз-қиш даврига тайёрлаш учун масъул бўлган барча тузилмаларнинг фаолиятини мувофиқлаштириш вазифаси юкланади.

Мавжуд муаммоларни ҳал қилиш ва аниқланган камчиликларни бартараф этиш, жойлардаги комплекс раҳбарларининг шахсий масъулиятини ошириш юзасидан зарур чора-тадбирлар кўрилади.

Ижтимоий соҳа объектларини куз қиш мавсумида барқарор ишлашини таъминлаш бўйича ишчи гуруҳ таркиби, ижтимоий соҳа объектларини 2020/2021 йиллар куз-қиш даврида барқарор ишлашга тайёрлаш мукаммал ва жорий таъмирлаш режасининг асосий кўрсаткичлари тасдиқланади.

Ижтимоий соҳа объектларини куз-қиш мавсумида барқарор ишлашини таъминлаш бўйича ишчи гуруҳ (А.Абдуҳакимов)га:

ижтимоий соҳа объектларни куз-қиш мавсумига барқарор тайёрлаш мақсадида тегишли вазирлик, идора, хўжалик бирлашма ва ҳудудий ҳокимликларни жалб этган ҳолда ҳудудларда амалга оширилаётган ишларни доимий мониторинг қилиш;

вилоятлар, шаҳарлар ва айниқса қишлоқ туманларида ижтимоий соҳа объектларини барқарор ишлашга тайёрлаш ишларини, шу жумладан мактабгача таълим муассасалари, мактаблар ва соғликни сақлаш вазирлиги объектларини мавсумга пухта тайёргарлик кўрилиши, бунда биноларнинг ички иссиқлик таъминоти тизимлари созлиги, ойна ва эшиклар иссиқлик энергиясини сақлаб қолишига мослаштирилганлиги, биноларнинг том ва деворларнинг ён қисмларини тўлиқ таъмирлаганлиги ва кучли ёғингарчилик даврида чакка ўтиши олдини олишга тайёрлигини ҳамда ҳудудларининг санитария ҳолати талабларига мувофиқ тартибга келтирилишини жойларга чиққан ҳолда назорат қилиш;

ўрганиш натижалари бўйича объектларни куз-қиш даврига тайёрлаш учун масъул бўлган барча тузилмаларнинг фаолиятини мувофиқлаштириш топширилади.

Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимларига:

иқтисодиёт тармоқлари, коммунал, транспорт ва ижтимоий соҳа объектларни 2020/2021 йиллар куз-қиш даврида барқарор ишлашга тайёрлаш бўйича белгиланган 3 та йўналишлар бўйича ҳудудий ишчи гуруҳларни ташкил этиб, раҳбарлик қиладилар ҳамда белгиланган ишларни ўз вақтида ва сифатли бажарилиши учун шахсий масъулияти алоҳида белгилаб қўйилади;

муҳандислик коммуникациялари ва технологик ускуналарни 2020/2021 йиллар куз-қиш даврида барқарор ишлашга тайёрлаш, хусусан, марказий ва маҳаллий қозонхоналар, иссиқлик ва ичимлик сув тармоқларида мукаммал ва жорий таъмирлаш ишларини амалга оширилиши белгиланган ишлар бўйича талаб этиладиган маблағлар маҳаллий бюджет ҳисобидан ўз вақтида ажратилиши таъминланади.

Ўзбекистон Республикаси бош вазирининг аграр ва озиқ-овқат соҳаларини ривожлантириш масалалари бўйича ўринбосари Ў.Барноев Иқтисодий тараққиёт ва камбағалликни қисқартириш вазирлиги, “Ўзбекозиқовқатзахира” уюшмаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари 2020 йил 1 сентябргача бўлган муддатда:

Ўзбекистонда Республикасида илк бор коронавирус инфекцияси (пандемия) аниқланишида юзага келган карантин даврида амалга оширилаётган ишлар доирасида Республика учун оғир шароитда тўпланган тажрибадан келиб чиққан ҳолда чуқур таҳлил натижалари асосида аҳолининг эҳтиёжларидан келиб чиқиб, вилоятлар, шаҳарлар ва туманлар бўйича 2020/2021 йиллар қиш-баҳор даври учун қишлоқ хўжалиги маҳсулотлари асосий турларини ғамлашнинг реал ҳажмларини белгилайди;

бунда нархларнинг кескин кўтарилиб кетишига йул қўймаслик мақсадида картошка, пиёз, сабзи, карам, гуруч ва дуккакли экинлар маҳсулотларини ғамлашга алоҳида эътибор қаратилади;

ғамланиши керак бўлган қишлоқ хўжалиги маҳсулотларининг асосий турларини сақлашнинг зарур шароитларини таъминлаш ҳамда ғамлашнинг тўлиқлиги ва маҳсулотларнинг зарур тарзда сақланиши учун масъул шахсларни белгилаш бўйича аниқ таклифлар белгиланган тартибда киритилади.

Олис тоғли ҳyдудларда жойлашган ва сел келиши оқибатида йўллари талафот кўриш эҳтимоли бўлган қишлоқларда камида 15-20 кунга етадиган асосий турдаги озиқ-овқат ҳамда ёқилғи энергетика ресурслари захираси яратилиши таъминланади.

“Ўзбекозиқовқатзахира” уюшмаси раиси З.О.Файзиев зиммасига қишлоқ хўжалиги маҳсулотларининг асосий турларини захирага ғамлашнинг тўлиқ ҳажмда ва белгиланган муддатларда таъминланиши учун шахсий масъулият юкланади.

Марказий банк (Нурмуродов) Тижорат банклари томонидан қишлоқ хўжалиги маҳсулотларини тайёрловчи ташкилотларга ҳамда уй-жой фондини 2020-2021 йиллар куз-қиш мавсумида барқарор ишлашга тайёргарлик қўриш бўйича амалга оширилиши лозим бўлган мукаммал таъмирлаш ишлари учун имтиёзли кредитлар ўз вақтида ажратилишини таъминлайди.

Ўзбекистон Республикаси Молия вазирлиги (Ишметов):

Республика комиссиясининг хулосасига кўра, ўткир зарурат мавжуд бўлган ҳудудларда иқтисодиёт тармоқлари ва ижтимоий соҳани куз-қиш даврига тайёрлаш бўйича амалга оширилаётган ишларни ўз вақтида молиялаштириш учун қўшимча захираларни шакллантиради.

Халқаро молиявий институтлардан Коронавирус глобал пандемиясининг салбий оқибатларига қарши курашиш чора-тадбирлари учун грантлар ва узоқ муддатли имтиёзли молиялаштиришни жалб қилинаётган маблағлар, хусусан:

соғлиқни сақлаш тизимини қўллаб-қувватлаш учун Осиё инфратузилмавий инвестициялар банкидан (ОИИБ) 100 млн доллар миқдорда маблағларни;

мева-сабзавот секторидаги корхоналарни молиялаштириш мақсадида JICA’нинг 200,0 млн доллар маблағларни;

энергетика соҳасидаги ислоҳотларни амалга ошириш учун ОТБ (200 млн доллар) ва Франция тараққиёт агентлигининг (150 млн евро) бюджетни қўллаб-қувватлаш қарз маблағларини;

коммунал ва энергетика корхоналарининг айланма маблағларини қўллаб-қувватлаш мақсадида ЕТТБнинг 100,0 млн доллар маблағларни ўз муддатларда жалб қилиш ва мақсадли фойдаланишни таъминлаш юзасидан тезкор чоралар кўрилади.