АҚШ 5 та давлатни террорчиликка қарши курашда ҳамкорликдан бош тортишда айблади

Бу ҳақда Оқ уй баёнотида айтилган.

“Кеча давлат департаменти конгрессни Эрон, Куба, Шимолий Корея, Сурия ва Венесуэла қурол экспорти устидан назорат ҳақидаги қонунга мувофиқ, 2019 йилда террорчиликка қарши курашда АҚШ билан тўлақонли ҳамкорлик қилмаган давлатлар деб белгиланганидан хабардор қилди”, дейилган ҳужжатда. 

Хабарда таъкидланишича, юқорида тилга олинган қонун бундай тасниф остига тушган давлатларга мудофаа маҳсулотлари ва хизматларини сотиш ва экспорт қилишни тақиқлайди.

Жумладан, АҚШ Кубани Колумбияга Миллий озодлик армияси (МОА) вакилларини беришдан бош тортишда айблаган. МОА вакиллари Кубага 2017 йилда Колумбия ҳукумати вакиллари билан музокаралар ўтказгани келишган. Ушбу ташкилот 2019 йилда Колумбия пойтахти Боготада 22 киши ҳалок бўлишига олиб келган полиция бўлимини портлатиш учун жавобгарликни ўз зиммасига олган. 

АҚШ анъанавий тарзда Эронни дунёда террорчиликнинг энг йирик ҳомийси деб атаб келади ва уни “Ҳизбуллоҳ” ҳаракати, Фаластин ва Яқин Шарқдаги террорчи гуруҳлар ва тузилмаларни қўллаб-қувватлашда айблаб келади. 

Сурия ҳам террорчиларни, жумладан “Ҳизбуллоҳ”ни қўллаб-қувватлашда айбланади. Шимолий Корея эса 1970 йилда Японияга қарашли йўловчи самолётни Шимолий Кореяга олиб қочган 4 нафар японияликни яшираётгани учун ушбу рўйхатга тушган. 

АҚШ аввалроқ Венесуэла раҳбариятига Колумбия инқилоб қуролли кучлари билан “оғуфурушлик ва террорчиликда ҳамкорлик қилиш” айбловини қўйган.