Коронавирусга қарши курашга 40 млн доллар тўплай олган 100 ёшлик британиялик қарияга рицар унвони берилади

Бу ҳақда Британия бош вазири Борис Жонсон девонхонаси маълум қилган.

“Хайрия йиғиш бўйича полковник Том томонидан бошланган ақлбовар қилмас кампания бутун мамлакатни илҳомлантирди ва коронавирус туманида биз учун умид маёғига айланди. Бу ажойиб воқеадан таъсирланган барча номидан унга катта раҳмат айтмоқчиман. Бу инсон – ҳақиқий миллат бойлигидир”, деб айтган Жонсон.

Бош вазир 100 ёшли фахрийни мукофотлашни шахсан илтимос қилган ва Британия қироличаси Елизавета II унинг илтимосини бажо келтирган. Мурга рицарлик унвони берилиши расмий маросими санаси пандемия давом этаётгани сабабли ҳали белгиланмаган. Британияда рицар унвони кўпинча 5 даражалик Британия империяси ордени билан бирга берилади. Мурга ҳозирча қайси даражадаги орден берилиши номаълум, бироқ капитан унвонида истеъфога чиққан қарияга аввалроқ полковник унвони берилди.

Уруш вақтларида Ҳиндистон ва Бирмада хизмат қилган қария коронавирусга қарши курашда Британия соғлиқни сақлаш миллий тизимига ёрдам бериш мақсадида у учун хайрия маблағлари йиғилишини эълон қилгандан кейин мамлакатга танилиб кетди. У маблағларни жалб этиш учун ўзининг боғида 25 метрлик масофани яшаган йилларига тенг маротаба, яъни 100 марта юриб ўтишга ваъда берган. Бироқ тиниб-тинчимас қария бу билан тўхтаб қолмай, боғини 200 марта айланиб чиққан.  

Мурнинг бу хайрия акцияси Британия аҳолисида катта қизиқиш уйғотган ва у дастлаб режалаштирилган минг фунт стерлингдан ўн минглаб марта кўпроқ маблағ йиғишга муваффақ бўлган.