Андижонда Польшага ишга жўнатиш ваъдаси билан фуқаролар пулини қўлга киритган корхона фаолиятига чек қўйилди

Андижон вилоятининг Избоскан туманида фаолият юритган «Legal help servis» МЧЖ раҳбари А.Т. ва бошқалар Польша давлатига ишга жўнатиш баҳонаси билан фуқароларнинг пулларини қўлга киритганликда айбланмоқда.

Бош прокуратура ҳузуридаги Департаментнинг Избоскан туман бўлими томонидан фуқаролар У.К. ва М.А.ларнинг мурожаатига асосан ўтказилган терговга қадар текширувда, фуқаро А.Т. ва бошқалар ноқонуний даромад орттириш мақсадида «Legal help servis» МЧЖни ташкил этиб, бир неча фуқароларни алдаб, ишончига кириб, уларни Польша давлатига 4 ой муддатда ишга юборишини айтиб, 5 150 АҚШ доллари ва 12,6 млн сўмини фирибгарлик йўли билан қўлга киритганликлари аниқланган.

Ҳолат юзасидан А.Т. ва бошқаларга нисбатан Жиноят кодексининг 168-моддаси 2-қисми билан жиноят иши қўзғатилиб, тергов ҳаракатлари ўтказилмоқда.

Маълум бўлишича, Бандлик ва меҳнат муносабатлари вазирлиги сайтидаги хусусий бандлик агентликлари реестрида «Legal help servis» МЧЖнинг номи қайд этилмаган.

Қонун талабига кўра, хорижий давлатларда иш билан таъминлаш фаолияти билан шуғулланиш учун махсус лицензия талаб этилади.