«Ҳатто ҳеч ким сўрамади ҳам» — COVID-19дан вафот этган шифокорнинг яқинлари ҳеч қандай рағбат берилмаганидан норози

Мурожаатда айтилишича, унинг ўғли — шифокор Валижон Исаев Самарқанд вилоят перинатал марказида ишлаб келган. Юртимизда карантин эълон қилингач, карантинга олинган ҳомиладор аёллар болаларини жарроҳлик йўли билан дунёга келтириш учун икки марта 14 кунлик даволашда иштирок этган. Учинчи марта ҳам 14 кунлик даволаш марказига кирганида ўзи ҳам коронавирус юқтирган.

«Ўғлимга 3 июль куни Covid-19 ташхиси қўйилгач, вилоят юқумли касалликлар шифохонасига ётқизилди. 19 кун оғир аҳволда ётиб, 23 июль куни вафот этди. Орадан шунча кун ўтдики, махсус буйруқ билан касалликка қарши курашиб вафот этган ўғлимни тиббиёт соҳаси масъулларидан ҳеч ким эсламади. Вилоят соғлиқни сақлаш бошқармасига борганимизда қабул ҳам қилишмади», — дейди М.Исаев.

Шунингдек, марҳумнинг яқинлари Валижон Исаев коронавирусга қарши курашга жалб этилиб, энди унинг оиласи, ортидан қолган беш нафар вояга етмаган фарзандига ҳеч қандай ёрдам берилмаётгани, рағбат пуллари ажратилмаганини айтишмоқда.

Ҳолатга аниқлик киритиш учун Самарқанд вилоят перинатал марказида бўлдик.

Марказ раҳбари Лола Ҳамроеванинг айтишича, мазкур муассаса карантин эълон қилингач, барча туманлардан коронавирус юқтирганликда гумон қилинган, касалликка чалинганлар билан мулоқотда бўлган ҳомиладор аёлларни қабул қилган. Шифокорлар ҳақиқатан ҳам 14 кунлик режимда ишлашган.

Жумладан, марҳум В.Исаев ҳам апрель, май, июнь ойларида мана шу гуруҳларда ишлаган. Бу шифокорларнинг айнан мазкур бўлимларда фаолият юритиши учун перинатал марказ раҳбарининг ҳар 14 кунда ҳар бир тиббиёт ходимининг исм-шарифи билан махсус буйруқ чиқарилган.

Ўтган даврда касалликка гумон қилинган ва мулоқотда бўлган минглаб ҳомиладор аёллар қабул қилиниб, даволанган. Жумладан, барча «қизил» ҳудудда яшовчи ҳомиладор аёллар ҳам шу ерга қабул қилинган.

Ана шундай беморлар билан ишлашда муассаса шифокори В.Исаев касаллик юқтириб, шу сабабдан вафот этган. Аммо мазкур шифохонада ишловчи врачларга қўшимча тўлов ёки рағбатлантириш пуллари назарда тутилмаган.

Перинатал марказ раҳбари бу масала марказ доирасида ҳал этилмаслиги, шу сабабдан вилоят соғлиқни сақлаш бошқармасига ва бошқа тегишли ташкилотларга муаммо юзасидан хат билан чиққанини маълум қилди. Бироқ бу хатларга жавоб келмаган.

Марказ ходимларининг маълум қилишича, бу ерга коронавирусга гумон қилинган ҳомиладор аёллар биринчи навбатда тиббий ёрдам, туғруқни амалга ошириш ва ҳатто жарроҳлик амалиёти учун олиб келинади. Бундай вазиятда ҳеч қайси шифокор аввал беморда коронавирусга таҳлил олиниши ва унинг жавоби келишини кутиб турмайди. Бундай тартибнинг ўзи йўқ, касалликка гумон қилинган, касалланганлар билан мулоқотда бўлган, «қизил» ҳудуддан келтирилган ва ҳатто иситмаси баланд бўлган, касалликнинг айрим аломатлари сезилиб турган беморларга ҳам тиббий хизмат кўрсатишган.

Бошқача айтганда, бу шифокорлар ҳам «уруш»нинг энг хавфли чизиқларида меҳнат қилган. Қолаверса, уларга айнан мана шу сабабдан махсус буйруқ чиқарилган. Буйруқ бўлгани ҳолда уларнинг бирортасига ҳатто 6 фоизлик устама ҳам қўшиб берилмаган.  

Вилоят соғлиқни сақлаш бошқармаси раҳбари ҳолатга қисқача изоҳ берди.

Унга кўра, тегишли ҳужжатларда белгиланганидек, рағбатлантирувчи маблағ касалликда гумон қилинганлар билан ишловчи ходимларга эмас, балки айнан коронавирусга чалинган беморларни даволаш билан шуғулланган тиббиёт ходимларига берилади.

Шунингдек, шифокорларга бериладиган рағбат республика махсус комиссияси томонидан белгиланган ҳужжатлар асосида тарқатилиши маълум қилинди.

Хуллас, Самарқанд вилоят соғлиқни сақлаш бошқармаси раҳбарияти вилоят перинатал марказида коронавирусга гумонланганлар билан ишловчи ходимлар рағбатлантирилмаслигини маълум қилди.

Демак, мутасаддиларга кўра, коронавирусга гумонланган, касалланганлар билан мулоқотда бўлган, беморларни махсус бўлимларда 14 кунлик карантин шароитида даволаса-да, бундай шифокорларга республика махсус комиссияси низомида махсус тўловлар кўзда тутилмаган. Гарчи шифокор гумонланувчи беморлар билан тўғридан тўғри ишлаб вафот этган бўлса ҳам! Модомики шундай экан, юқоридаги каби шифокорлар тақдирини ҳам республика махсус комиссияси масъуллари кўриб чиқишлари керакка ўхшайди.

Чунки 5 боб ва 41 банддан иборат мазкур низомда мана шу каби ҳолатлар эътиборга олинмагани юзасидан ҳам мурожаатлар бўлмоқда.

Жумладан, Самарқанднинг ўзида июль ойида ҳам яна бир тиббиёт ходимининг мурожаати эълон қилинган эди: мурожаат эгаси — Самарқанд шаҳар санитария-эпидемиология осойишталиги маркази шифокори Шоира Эшбекова шаҳар бўйича касалланиш эҳтимоли юқори бўлган биринчи ўчоқларда 3500 нафардан ортиқ фуқаролардан тест намуналари олишда ва вилоят вирусология таҳлилхонасига етказиб беришда иштирок этган. Натижада ўзи ва бутун оиласи касалланиб, даволаниб чиққан, аммо 25 миллион сўмлик махсус тўлов ҳам, касалланган тиббиёт ходимларига бериладиган маблағ ҳам ололмаганидан шикоят қилганди. Мутасаддилар бу ҳолатда республика махсус комиссияси низомида кўрсатилган қоидаларга кўра, Ш.Эшбекованинг маошига фақат 6 фоизлик устама берилишини маълум қилганди.

Дарвоқе, марҳум В.Исаев ишлаган вилоят перинатал марказининг юқумли касалликлар бўлими карантин даврида вилоят соғлиқни сақлаш бошқармаси буйруғи билан ёпилган ва мазкур бўлим «коронавирус инфекцияси тарқалишини олдини олиш бўйича фаолияти давом эттирилсин», дейилган буйруқда.

Перинатал марказга мана шу буйруққа асосан бутун вилоятдаги коронавирусга гумонланган ҳомиладор аёллар келтирилган ва махсус шароитларда шифокорлар 14 кунлик карантин тартибида уларни даволаган эди.

Шунинг учун ҳам беморнинг яқинлари ҳозирги ҳолатдан норози бўлишмоқда. Яна бир гап: модомики қоидага кўра чиндан ҳам коронавирусга қарши курашда жабрланган ёки вафот этган шифокорларнинг барчасига ҳам махсус тўловлар берилмас экан, ўша шифокорларнинг яқинларини қабул қилиш ва буни тўғри тушунтириш керак, назаримизда.

Анвар МУСТАФОҚУЛОВ, Kun.uz мухбири.