Луис Суареснинг «Ювентус»га ўтиши аниқ бўлиб бормоқда. Marca нашрининг ёзишича, уругвайлик ҳужумчи туринликлар билан 2+1 шаклида шартномага имзо чекади ва унинг маоши барча солиқлардан ташқари йилига 10 миллион еврони ташкил қилади (унинг каталонияликлар клубидаги маоши 11,5 млн евро эди). Италияда солиқ қонунчилиги бироз енгил бўлгани туфайли «Ювентус» «Барселона»дан камроқ пул сарфлаб туриб ҳам, Суаресга кўпроқ маош бериш имкониятига эга. Ҳозирда Луис Суарес «Барселона» билан амалдаги шартномасини бекор қилиш устида иш олиб бормоқда. У «Барселона»дан шартнома муддатидан аввал бекор қилинаётгани учун 14 млн евро ундирмоқчи. Ўз навбатида «Барселона» Суарес трансфери учун «Ювентус»дан пул олишга умид қилмоқда.
«Барселона» Мемфис Депайнинг трансфери бўйича «Лион» билан келишиб бўлган. La Vanguardia нашри хабарига кўра, трансфер қиймати 25 миллион еврони ташкил қилиши кутилмоқда. Ҳозирда музокараларнинг сўнгги босқичи давом этяпти ва шундан сўнг трансфер расман эълон қилинади. Daily Star эса, каталонияликлар бошқа бир нидерландиялик яримҳимоячи трансферини ҳал қилганини айтмоқда. «Ливерпуль» аъзоси Жоржиньо Вейналдум 20 миллион евро эвазига «Барселона»га ўтади. Айтиш мумкинки, Депай ҳам, Вейналдум ҳам, Нидерландия миллий жамоаси таркибида айнан Рональд Куман қўл остида тўп суришган.
«Вильярреал» Херонимо Рульининг трансферини эълон қилди. 28 ёшли дарвозабон ўтган мавсумда «Реал Сосьедад» жамоасида тўп сурганди. Трансфер қиймати 7,5 миллион еврога баҳоланди. Аргентиналик посбон билан шунингдек, «Эвертон» ҳам қизиқаётганди.
Яна бир расмий хабар «Аталанта» расмий сайтида чиқди. Клуб «Ювентус» марказий ҳимоячиси Кристиан Ромерони ижарага олганини маълум қилди. Келишув икки йиллик бўлиб, кейинчалик бергамоликлар 18 миллион еврога футболчини бутунлай сотиб олиш имконига эга бўлади.
Daily Star хабарига кўра, «Вест Ҳэм»нинг бразилиялик яримҳимоячиси Филипе Андерсонга «Арсенал» қизиқиш билдирмоқда. Андерсон ўтган мавсумни муваффақиятсиз ўтказган бўлса-да, юқори салоҳиятга эга ҳисобланади ва Микель Артета ушбу ҳужумкор футболчига ишонмоқда. Андерсон икки йил олдин «Вест Ҳэм»га «Лацио»дан трансфер қилинганди. «Вест Ҳэм» Андерсонга сотишга рози бўлиши мумкинлиги ҳақиқатга яқин, зеро лондонликлар яқинда 13,5 миллион еврога Грейди Диангана билан 5 йиллик шартнома имзолади. 22 ёшли вингер ўтган мавсумни «Вест Бромвич» сафида ўтказганди.
