Қўшимча функционаллар
-
Тунги кўриниш
Украинада Байден ва Порошенкога нисбатан жиноят ишлари очилди
Украинада собиқ бош прокурорлардан бирининг фаолиятига аралашишда гумонланиб мамлакат собиқ президенти Пётр Порошенко ва АҚШ президенти Жозеф Байденга нисбатан жиноят ишлари очилди. Бу ҳақда Порошенконинг адвокати Игор Голован маълум қилди.
"22 январ куни, АҚШ президенти инаугурациясидан икки кун ўтгач гўёки Порошенко ва Байден томонидан Украина собиқ бош прокурорининг фаолиятига аралашиш ҳолати бўйича иккита жиноят иши очилди", - дея Голованнинг сўзларидан иқтибос келтиради Klymenko Time портали ўз Telegram-каналида.
Адвокатнинг маълум қилишича, бу рада депутати Андрей Деркачнинг ташаббуси ҳисобланади.
Деркач 2020 йил майида ўзининг сўзларига кўра, Байденнинг Украинанинг бешинчи президенти Пётр Порошенкога таъсири ҳақида гувоҳлик берувчи аудиоёзувларни эълон қилганди. Шундан сўнг АҚШ уни санкциялар рўйхатига киритганди. Ўшанда АҚШ молия вазирлиги Деркач 10 йилдан ортиқ вақтдан буён Россия махсус хизматлари учун ишлашини билдирганди.
Украинада 2016 йилда бош прокурор Виктор Шокиннинг бўшатилиши билан боғлиқ можарога Байден алоқадор деб ҳисобланади. Қайд этилишича, у АҚШ вице-президенти лавозимида Порошенкога нисбатан босим ўтказган ва бош прокурорни лавозимидан бўшатишни талаб қилган. Акс ҳолда Киев Вашингтоннинг 1 млрд долларлик кредит кафолатидан маҳрум бўлишини айтиб таҳдид қилган.
Ўз навбатида, Шокинни истеъфога чиқариш зарурияти Байденнинг ўғли Ҳантернинг Украинадаги Burisma газ компаниясидаги раҳбарлик фаолиятига нисбатан бош прокуратура томонидан қизиқиш уйғонишига олиб келган.
