«Ливерпуль»да инқироз тугадими? «Юнайтед»да бошландими? Тухель Англиядаги илк ғалабасига эришадими? «Бавария»нинг асосий таъқибчиси ким? Ушбу ҳафта ўйинларида шу ва бошқа бир қатор муҳим саволларга жавоб излашимиз мумкин. Дам олиш кунларининг асосий ўйинлари ҳақида навбатдаги анонсимизда:
АПЛ. 21-тур
30 январь (шанба)
АРСЕНАЛ – МАНЧЕСТЕР ЮНАЙТЕД
Ўйин бошланиш вақти: 22:30
ТВ-трансляция: FutbolTV
Сульшер янги мураббий этиб тайинланганида, 13 ўйиндан иборат мағлубиятсиз серияни амалга оширган ва фақат Лондонда «Арсенал» бу юришга чек қўйганди. Худди шундай ҳолат жорий мавсумда ҳам юз беришига яқин қолганди, аммо ўтган турда «Шеффилд» «Олд Траффорд»да ғалаба қозонди ва «Юнайтед»нинг 13 ўйиндан иборат мағлубиятсиз сериясига чек қўйилди. Аммо Артета шогирдлари яна бир серияни тўхтатишлари мумкин – роппа-роса бир йилдан бери «МЮ» сафарда мағлубият нималигини билмаяпти.
«Арсенал»нинг ҳам ўз муваффақиятли серияси бор, жамоа 7 ўйиндан бери АПЛда ютқазмаяпти. Тўғри, орада «Кристал Пэлас» билан нурсиз дуранг, кубок баҳсида «Саутҳэмптон»дан мағлубият умумий таассуротни бузиб турибди, аммо «Арсенал» сўнгги бир ойда анча ўзига келиб олганини бемалол пайқаш мумкин. Артетанинг истеъфоси ҳақидаги фикрлар чекинди, энди жамоа еврокубоклар, ҳатто ЕЧЛ ўринлари учун ҳам бемалол курашиши мумкин.
Таркибларга тўхталсак, мезбонларда Себальос, Тирни каби футболчилар жароҳатда, шунингдек, Обамеянгнинг майдонга тушиши сўроқ остида. Аммо Партининг майдон марказига қайтгани «Арсенал»нинг имкониятларини оширади, зеро биринчи даврадаги ўйинда айнан ушбу футболчи ҳал қилувчи вазифаларни бажарганди. «Юнайтед» таркибида барча футболчилар сафда, ҳатто кичик жароҳат туфайли ўтган ўйинларда қатнаша олмаган Байи ва Линделоф ҳам ўйинга тайёр. «Шеффилд» билан ўйинда баъзи ўйинчиларнинг ўта муваффақиятсиз ўйин кўрсатганини эътиборга олсак, Сульшер таркибда ва тактикада бир қатор ўзгаришлар қилиши ҳам табиий.
Хуллас, аслида шунча гап ортиқча, турнир жадвали, сўнгги пайтлардаги спорт формаси, таркибдан қатъи назар, ахир бу «Арсенал» ва «Юнайтед» – инглиз футболи классикаси, шундай эмасми? Табиийки, бизни курашларга бой, шиддатли учрашув кутиб тургани шубҳасиз. Яна бир қизиқ факт – Сульшер мураббий сифатида ҳали Артетани мағлубиятга учрата олгани йўқ. Икки ўйинда ҳам лондонликлар гол ўтказмасдан ғалаба қозонишнинг уддасидан чиқишган. Яқинда норвегиялик мутахассис Клоппга қарши мана шундай нохуш анъанага чек қўйганини эътиборга олсак, балки Артета тўсиғи ҳам забт этилар?
30 январь (шанба)
Бундеслига. 19-тур
Мавзуга оид
ЛЕЙПЦИГ – БАЙЕР
Ўйин бошланиш вақти: 22:30
ТВ-трансляция: SportTV
Ҳар доимгидек, Бундеслигадаги чемпионлик интригаси баҳоргача етиб бормади. «Бавария» 7 очколик фарқ билан биринчи ўринга мустаҳкам жойлашиб олди. Аммо ЕЧЛ йўлланмаси ўринлари учун кураш жуда кескин кечиши кутилмоқда, зеро қолган уч ўринга камида 7-8 жамоа даъвогарлик қилмоқда.
«Байер» ва «Лейпциг» мана шу таъқибчилар гуруҳида энг олдинда боришмоқда ва бу ўйин лигадаги иккинчи жамоани аниқлаб беради. «Байер» жуда яхши формага кирган ва ҳатто турнир жадвалида пешқадамлик ҳам қилганди, аммо охирги ўйинларда, айниқса топ ўйинларда «Байер» ўзига бўлган ишончни йўқотди. Леверкузенликларнинг охирги 6 ўйиндан 5 таси айнан юқори ўринлар учун курашаётган жамоаларга қарши бўлди ва фақат «Боруссия» мағлуб этилди холос. «Бавария», «Айнтрахт», «Юнион Берлин» ва «Вольфсбург» билан ўйинларда мағлубият. «Лейпциг» ҳам ўзига яраша омадсизлик қуршовида қолган – охирги 4 ўйинда атиги бир мағлубият.
Ҳар икки жамоада шунингдек, жароҳатлар ҳам кўп. Мезбонлар таркибида Хенрикс, Форсберг, Кампль ва Лаймерлар учрашувда жамоасига ёрдам бера олишмаса, «Байер» Вайзер, Амири, Арьяс ва Бендерларнинг ёрдамига таяна олмайди.
Яна бир қизиқ ҳолат, ушбу рақибларнинг сўнгги 3 ўзаро ўйини бир хил – 1:1 ҳисобида тугаган. Умуман олганда, «Байер» «Лейпциг» устидан атиги 1 маротаба ғалаба қозонган холос. Ўша ўйин ҳам «Лейпциг» майдонида (1:4) амалга ошганди. «Редбулчилар» 4 ўйинда устун келишган, яна 4 ўйин дуранг билан тугаган.
«Байер» ушбу ўйинда ғалаба қозониб, 2-ўринга кўтарилиб олиши, аммо агар мағлубиятга учраса, биратўла 7-ўринга тушиб кетиши ҳам мумкин.
АПЛ, 21-тур
31 январь (якшанба)
ВЕСТ ҲЭМ – ЛИВЕРПУЛЬ
Ўйин бошланиш вақти: 21:30
ТВ-трансляция: Futbol TV/UzReportTV
«Ливерпуль» ниҳоят январь ойида гол уришга улгурди ва тўрт ўйиндан иборат голсиз сериясига чек қўйди. Клопп жамоаси яна эски режимга қайтиб, ўз ўйинини топдими ёки муаммолар давом этадими, айнан шу саволга жавоб излаш учун айни муддао ўйин. Рақиб ҳам «Вест Ҳэм» - катта эҳтимол билан январнинг энг яхши жамоаси.
Мойес жамоаси мағлубиятсиз ўйинлар сонини 7тага етказди. 2021 йилда эса барча 6 ўйинни ўз фойдасига ҳал қилди. Бу ўйинларнинг 4тасида «Вест Ҳэм» ўз дарвозасидан гол ҳам ўтказиб юбормади. Натижада Мойес мураббий сифатида сўнгги етти йилда илк бор кучли тўртликдан вақтинча бўлса-да, ўрин олди. Кейинги тўрт кунда лондонликларни «Ливерпуль» ва «Астон Вилла»га қарши муҳим ўйинлар кутиб турибди ва бу учрашувлар «Вест Ҳэм»нинг ҳақиқий салоҳиятини намойиш қилса, ажаб эмас.
«Вест Ҳэм» умуман топ рақибларга қарши анча ишончли ҳаракат қилмоқда. «Манчестер Сити» ва «Тоттенҳэм»га қарши ўйинларда дуранг, «Лестер» ва «Эвертон» сафарда мағлуб этилган. «Энфилд»даги ўйинда ҳам, эсингизда бўлса, жамоа олдинда борган, фақат Диогу Жота иккинчи бўлимда майдонга тушиб, 85-дақиқада ғалаба голини урганди. Умуман олсак, Юрген Клопп «Вест Ҳэм»га қарши илк тўрт ўйинида қийналган, дастлаб 0:2 ҳисобида мағлубиятга учраб, кейин Англия кубогида аввал дуранг, кейин қўшимча вақтда мағлуб этилган. 2016 йилнинг охирида эса «Энфилд»да 2:2 ҳисоби қайд этилган. Ана шундан кейинги 8 учрашувнинг 7тасида «Ливерпуль» ғалабага эришган.
«Ливерпуль»да марказий ҳимоячиларнинг, ундан кейин марказий ҳимояда ўйнаётган яримҳимоячиларнинг жароҳат олиши давом этиб келмоқда. Энди Фабиньо ҳам жароҳат олди, яқиндагина қайтган Матип «Тоттенҳэм» билан ўйинда мажбуран алмаштирилди. Сўнгги ўйинларда жуда катта ҳажмдаги ишларни амалга ошираётган Алкантаранинг ҳам ҳолати сўроқ остида – бу ҳам катта муаммо бўлиши мумкин. Мезбонлар сафида Масуаку шерикларига ёрдам бера олмайди холос.
А Серия, 20-тур
31 январь (якшанба)
АТАЛАНТА – ЛАЦИО
Ўйин бошланиш вақти: 19:00
ТВ-трансляция: Futbol TV/UzReportTV
Атиги икки кун олдин «Аталанта» ва «Лацио» Италия кубоги чоракфиналида дуч келдилар. Воқеаларга бой бўлган учрашувда қизил карточка ҳам бўлди, урилмаган пенальти ҳам, иродали ғалаба ҳам. Бир киши кам бўлиб қолган бергамоликлар Миранчукнинг голи эвазига 3:2 ҳисобида устун келиб, яримфиналга чиқдилар.
Иккинчи тўқнашув энди А Серияда бўлиб ўтади ва кучли тўртлик учун курашда жуда аҳамиятлидир. Римликлар бу ўйинда ғалаба қозониб, кучли тўртликка кириб олишлари мумкин. Мавсумни ўртача бошлаган «Лацио» қаторасига 4 ўйинда ғалаба қозонди ва пешқадамлар гуруҳига яқинлашиб олди. «Аталанта»нинг эса, барча мусобақалардаги мағлубиятсиз ўйинлари сони 14тага етиб улгурди. Айниқса, «Милан»га қарши сафар ўйинидаги ишончли (3:0) ғалаба Гасперини шогирдларининг ҳали ҳам катта куч эканини исботлагандек. «Аталанта» ҳозирда пешқадам «Милан»дан у қадар узоқ (7 очко) эмас, яъни ҳали чемпионлик учун кураш ҳам давом этмоқда.
Мезбонлар таркибида Госенснинг йўқлиги жуда аҳамиятли бўлиши мумкин. Ҳам ҳужум ташкил қилишда, ҳам ҳимояланишда беназир бўлган германиялик футболчи «Милан» билан ўйинда навбатдаги сариқ карточкасини олганди ва бу дисквалификация учун етарли бўлди. Шунингдек, Хатебур ва Пашалич ҳам тикланиб улгуришгани йўқ. Рим жамоаси таркибида Катальди ва Сколари майдонга туша олишмайди.
Биринчи даврадаги учрашув Римда, меҳмонларнинг 4:1 ҳисобидаги ғалабаси билан якунига етганди. Умуман «Лацио» «Аталанта»га қарши охирги 9 ўйинда атиги бир маротаба ғалаба қозонган. Ўша ўйин 2019 йилнинг май ойида «Аталанта» майдонида бўлиб ўтганди.
Ла Лига. 21-тур
31 январь (якшанба)
БАРСЕЛОНА - АТЛЕТИК
Ўйин бошланиш вақти: 01:00
ТВ-трансляция: Futbol TV/UzReportTV
Бу мавсум Испания чемпионлиги учун баҳсда «Барселона» ёки «Реал» қандай қилиб «Атлетико»ни қувиб ўтишади, жуда қийин савол, аммо топ клуб сифатида барибир, «Барселона» ҳар бир ўйинда ғалаба қозонишга мажбур, акс ҳолда босим ошиб бораверади. Бунинг устига, «Атлетик» ўн кунгина олдин «Барселона»ни суперкубоксиз қолдирганди.
Жуда яхши юриш олган ва охирги 5 ўйинда фақат ғалаба қозонаётган Марселиньо шогирдлари «Камп Ноу»да ҳам осонликча таслим бўлмаслиги аниқ. Қизиғи, басклар охирги марта 7 январь куни, айнан «Барселона»дан 2:3 ҳисобида мағлубиятга учраганлар, ундан кейинги барча ўйинлар ғалаба билан якунланди. Бильбаоликларни тўхтатиш ва айланани ёпиш яна «Барселона»нинг чекига тушиб турибди.
Умуман олганда, «Атлетик» турнири жадвалида бирор бир юқори натижадан умид қилиши мушкул, ҳатто тўртинчи ўриндаги жамоадан ҳам 13 очколик фарқ бор. Хавфли зонадан ҳам етарлича масофа бор. Шундай бўлса-да, «Атлетик» учун бу мавсум ўзига хос унутилмас бўлиши мумкин. Юқорида айтганимиздек, яқинда Испания Суперкубоги қўлга киритилди. Айнан шу суперкубокда қатнашишга сабаб бўлган Испания кубоги -2020 финали ҳам ҳали ўйналмаган. Бильбаоликлар «Сосьедад»га қарши финалда тўп суришади. Бу ўйиндаги ғалаба «Атлетик»ка бир мавсумда икки соврин эгасига айлантирадики, бундай ҳолат охирги марта 1984 йилда рўй берганди. Бундан ташқари, «Атлетик» жорий Испания кубогида ҳам чорак финалга чиқди. Хуллас, кубок ўйинлардаги муваффақиятлар ва айниқса, «Барселона», «Реал» каби жамоаларга қарши алоҳида тўқнашувлардаги яхши ўйинлар бемалол Марселиньонинг ишларини ижобий баҳолашга асос бўла олади.
Серхио Бускетс «Эльче» билан ўйинда навбатдаги сариқ карточкасини олиб, навбатдаги ўйинни ўтказиб юборадиган бўлди. Шунингдек, Пике ва Коутиньолар ҳам камида бир ойга сафдан чиқишган. Меҳмонлар сафида эса жуда керакли ҳимоячилардан бири Баленсиагада жароҳат бор ва шерикларига ёрдам бера олмайди.
Бу ўйин Месси учун ҳам ўзига хос аҳамиятли бўлиши мумкин. Футболчи айнан «Атлетик» билан ўйинда майдондан четлатилган ва охирги икки ўйинни ўтказиб юборганди. «Райо Вальекано»га қарши кубок ўйинида у майдонга қайтди ва учрашувнинг энг яхши футболчиси деб эътироф қилинди.
