Инновацион ривожланиш вазирлиги сайтида бюджет харажатлари маълум қилиб борилади

Сайтдаги ушбу бўлимдан 2021 йил учун Инновацион ривожланиш вазирлигига ажратилган бюджет маблағлари, илмий фаолият, инновацион ишланмалар, амалий тадқиқотлар, жорий йилда молиялаштириладиган илмий лойиҳалар ва бошқаларга ажратиладиган маблағлар ҳақида маълумот олиш мумкин.

Вазирлик матбуот котиби Назокат Абдуқундузованинг Kun.uz мухбирига маълум қилишича, «Бюджет» саҳифаси очилишининг сабаби, аввало, бюджет харажатларининг шаффофлигини таъминлаш ва жамоатчиликни бу борада хабардор қилиш бўлса, иккинчи сабаби - олимлар, тадқиқотчилар ва илмий жамоатчиликни давлат дастурлари доирасида илмий лойиҳалар учун грант маблағларининг қандай тақсимланаётганидан хабардор қилишдир. 

Билдирилишича, ҳозирда Инновацион ривожланиш вазирлиги илмий лойиҳаларга маблағларни танлов асосида ажратиш амалиётини йўлга қўйган. Шу боис танловда ким ғолиб бўлди, қайси илмий жамоа қандай лойиҳа устида иш олиб бормоқда, деган савол туғилади. 

“Биз тақдим этган маълумотлар айнан шу саволларга жавоб беради. Шунингдек, мазкур ҳисоботларимиздан муайян илмий мавзуга қизиққан, шу соҳа мутахассиси бўлган тадқиқотчилар ўзлари қизиққан мавзулар бўйича олиб борилаётган тадқиқотларда иштирок этиш учун кимга ва қаерга мурожаат қилишлари мумкинлиги ҳақида маълумот оладилар”, - дейди у.