«Муаммо ҳисоблагичда эмас». Учтепа туманидаги хонадонда ёниб кетган газ ҳисоблагич бўйича расмий баёнот берилди

Учтепа тумани ҳокимлиги хабарига кўра, газ ҳисоблагичларни ишлаб чиқариш корхонаси ва "Технопарк" масъулияти чекланган жамияти сервис маркази ходимлари ушбу вазиятни батафсил ўрганишди. 

Хабарда айтилишича, бу хонадонда "Osten" газ ҳисоблагичлари билан боғлиқ муаммолар мавжуд эмас. 

“Олинган фотосуратлар ва маълумотларга асосланиб, ҳисоблагич бузилмагани, унинг герметиклиги сақланиб қолгани ва газ ҳисоблагич ишлашни давом эттириб, кўрсаткичларини кўрсатаётгани ҳақидаги хулосага келинган”, дейилади маълумотда. 

Қайд этилишича, хонадондаги ёнғин ташқи оловнинг, фильтрнинг қурилмага уланган жойига кўрсатилган таъсир натижасида юзага келган. 

“Яъни, муаммо газ ҳисоблагичи туфайли эмас, балки ташқи таъсир туфайли пайдо бўлган. Ҳимоя қутисига келсак, у шиша толали полимердан тайёрланган. Бу олов таъсирини сезиларли даражада камайтиради ва қути шаклини сақлаб қолади”, дейилган расмий хабарда.

Аввалроқ, Тошкентда барчага йил охирига қадар “ақлли” газ ҳисоблагичлар ўрнатилиши маълум қилинганди. 

Пойтахтда газ истеъмолчилари жами 629 427та бўлиб, шулардан 448 073тасини кўп қаватли, 181 354тасини эса ерли аҳоли хонадонлари ташкил этади. Йил охирига қадар замонавий “ақлли” газ ҳисоблагичлар барчага ўрнатилиши кўзда тутилган. Мазкур ҳисоблагичларни ўрнатиш аҳоли учун бепул ҳисобланиб, ташкилот томонидан 5 йиллик бепул сервис хизмати ҳам кафолатланиши айтилган.