Қашқадарёда корхонанинг 1 миллиард сўмлик дори воситаларини талон-торож қилган шахсга жиноий иш қўзғатилди

Қашқадарёда хусусий корхонанинг 1 миллиард сўмлик дори воситаларини талон-торож қилган шахсга нисбатан жиноят иши қўзғатилган. Бу ҳақда Бош прокуратура ҳузуридаги иқтисодий жиноятларга қарши курашиш департаменти хабар бермоқда.

Қайд этилишича, Департаментнинг Қашқадарё вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда, фуқаро Қ.Х. «J» хусусий корхонасининг йирик миқдордаги пулини талон-торож қилгани аниқланган.

Маълум бўлишича, Қ.Х. мазкур корхонада омборхона мудири вазифасида ишлаган даврида ўзининг моддий жавобгарлигида бўлган жами 1 миллиард сўмлик дори воситалари камомадига йўл қўйиб, унинг жуда кўп миқдордаги мулкини талон-торож қилган.

Таъкидланишича, мазкур ҳолат юзасидан Қ.Х.га нисбатан жиноят кодексининг 167-моддаси (талон-торож қилиш) билан жиноят иши қўзғатилиб, ҳозирда тергов ҳаракатлари ўтказилмоқда.