Ўзбекистонлик эркин курашчилар Қозоғистондаги турнирда Токио олимпиадасига 4та йўлланмани қўлга киритди

11 апрел кунги мусобақаларда ўзбекистонлик 6 нафар спортчи гиламга чиқди.

-57 кг вазн тоифаси вакили Ғуломжон Абдуллаев иштирокини чорак финалда бошлаб, дастлаб жанубий кореялик Сунггвон Кимни мағлуб этди (5:4). Ярим финалда Қирғизистон вакили Бекпўлат Мирназар ўғли таслим этилди (8:4), бу ғалаба Абдуллаевга Олимпиада йўлланмасини тақдим этди. Финал баҳсида эса у хитойлик Мингҳу Лиуни мағлуб этиб (10:0), олтин медални қўлга киритди.

Ўзбекистон шарафини -65 кг.гача вазн тоифасида ҳимоя қилган Илёс Бекпўлатов иштирокини муваффақиятли бошлаганди. У дастлаб саралаш босқичида тожикистонлик Жамшид Шарифов устидан яққол устунлик билан ғалаба қилди (11:0), чорак финалда эса хитойлик Ҳасибагена Ҳасибагена мағлуб этилди (10:0). Аммо ярим финалда кейинчалик шу вазн тоифаси чемпиони бўлган қирғизистонлик Эрназар Аҳмадалиев унинг курагини ерга теккизди. Бекпўлатов бронза учун туркманистонлик Керим Ходжаевга қарши курашиши керак эди, аммо у гиламга чиқмади.

-74 кг вазн тоифаси вакили Беҳзод Абдураҳмонов иштирокини чорак финалдан бошлаб, мўғулистонлик Бат Эрдене Бямбасуренни мағлуб этди (10:0). Ярим финалда унга Қирғизистон вакили Эломон Дўғдурбек ўғли рақиблик қилди ва у 4:2 ҳисобида мағлуб этилди. Ярим финалдаги ғалаба Абдураҳмоновга Олимпиада йўлланмасини тақдим этди. У финалда эронлик Юнус Алиакбар Имомишожаийга қарши курашиши керак эди, аммо у гиламга чиқмади ва кумуш медал билан кифояланди. Унинг учун Токио Олимпиадаси фаолиятидаги иккинчи олимпиада бўлади.

-86 кг вазн тоифасида ҳам Ўзбекистон вакили олтин медалга эга чиқди. Жавраил Шапиев дастлаб ливанлик Доменик Мишел Абу Нодирни мағлуб этиб (7:2), саралашдан ўтди. Чорак финалда тожикистонлик Баҳодур Қодиров (12:1), ярим финалда қозоғистонлик Азамат Даулетбеков таслим этилди (5:2). Ярим финалдаги ғалаба орқали Шапиев Токио Олимпиадаси учун йўлланмани нақд қилди. Финалда у Хитой вакили Зушен Лин устидан ғалабага эришиб (6:3), олтин медалга эга чиқди.

Ўзбекистоннинг -97 кг вазн тоифасидаги вакили Магомед Ибрагимов ҳам Олимпиадага йўлланма олди. У дастлаб покистонлик Муҳаммад Иномни мағлуб этди (8:0), ярим финалда эса қирғизистонлик Симбат Сулаймоновга имконият қолдирмасдан (11:1) финалга чиқди. Аммо у эронлик Муҳаммадҳусайн Асқари Муҳаммадиёнга қарши баҳсни ўтказиб юборди ва кумуш медал билан кифояланди.

125 кг вазн тоифасида турнирга борган Мақсуд Вейсалов эса биринчи жангидаёқ, чорак финалда ҳиндистонлик Сумит Сумитга ютқазиб (1:7), иштирокини якунлади.

Спорт курашлари бўйича Токио олимпиадасига йўлланма олган ўзбекистонлик спортчилар сони 8 нафарни ташкил этмоқда.

Эркин кураш:

• Ғуломжон Абдуллаев (57 кг);
• Бекзод Абдураҳмонов (74 кг);
• Жавраил Шапиев (86 кг);
• Магомед Ибрагимов (97 кг).

Юнон-рум кураши:

• Элмурат Тасмурадов (60 кг);
• Жалгасбай Бердимуратов (77 кг);
• Рустам Ассакалов (97 кг);
• Мўминжон Абдуллаев (130 кг).

Жорий йилнинг 6—9 май кунлари Болгария пойтахти София шаҳрида ўтказиладиган Токио олимпиадасига йўлланма тақдим этувчи жаҳон лицензион мусобақасида қолган вазн тоифаларида ҳам ўзбекистонлик курашчилар иштирок этиши кутилмоқда. Маълумот учун, мазкур мусобақада эркин курашда 2та, юнон-рум курашида ҳам 2та, аёллар курашида эса тўлиқ 6та йўлланмани қўлга киритиш имконияти бор.