Самарқандда орган ходимларини ҳақорат қилиб, кўчани «хулиганлар» бошқаришини айтган тиктокер 7 суткага қамалди

Самарқанд шаҳрида Ички ишлар ходимлари шаънига нисбатан ҳақоратомуз сўзларни айтгани тасвирланган видеони TikTok ижтимоий тармоғига жойлаштирган йигитларга қонуний чора кўрилган. Бу ҳақда вилоят ИИБ ахборот хизмати хабар берди.

Маълум қилинишича, ҳуқуқбузар йигитларнинг хатти-ҳаракатлари юзасидан тўпланган ҳужжатлар кўриб чиқиш учун Жиноят ишлари бўйича Самарқанд шаҳар судига юборилган.

Суд қарорига кўра, А.Ш.га Маъмурий жавобгарлик тўғрисидаги кодекснинг 183-моддасига (майда безорилик) асосан 7 сутка маъмурий қамоқ жазоси тайинланган. Шунингдек, видеолавҳани у билан бирга тайёрлаган яна бир шериги 4 сутка, видеони тасвирга олган учинчи йигит 4 суткага қамалган.

«Мент» сўзини видеолавҳада ишлатганмиз, аммо ўзимиз унинг маъносини билмаганмиз. Ички ишлар ходимлари ватанимиз тинчлиги учун қанчалик хизмат қилаётгани ҳақида хабарим бор. Қилган ишимдан чин кўнгилдан пушаймонман. Мени кечиришларини сўраб қолган бўлардим», – деган тиктокер судда.