Тошкентда ёнғин чиққан уйда ўсмир қиз 4-қаватдан тушиб кетди

Тошкент шаҳрининг Яшнобод туманидаги кўп қаватли уйлардан бирида аёл киши ўзини тўртинчи қаватдан ташлаб юборди. Ижтимоий тармоқларда ушбу ҳолат акс этган видео тарқади.

Фавқулодда вазиятлар вазирлиги хабарига кўра, Яшнобод туманидаги кўп қаватли уйлардан бирида ёнғин келиб чиққан. Шу боис, видеода тасвирланган ҳолат юз берган - аёл киши ўзини тўртинчи қаватдан ташлаб юборган.

Билдирилишича, мазкур ҳодиса Яшнобод тумани Алимкент 1-тор кўчасидаги кўп қаватли уйларнинг бирида содир бўлган. Аниқланишича, хонадондаги мебель жиҳозида (4 квадрат метр) ёнғин келиб чиққан.

Натижада, меҳмонга келган фуқаро С.А. уйнинг орқа томонидаги деразадан чиққан. ФВВ ходимлари томонидан автонарвон ёрдамида қутқарув ишлари амалга оширилаётган вақтда аёлнинг қўллари толиқиб, тўртинчи қаватдан ўзини ташлаб юборган.

Фуқарога биринчи тиббий ёрдам кўрсатилиб, шифохонага етказилди. Жабрланган фуқаро травматология бўлимига олиб борилганда, у маст ҳолда бўлгани аниқланган.

Ҳодиса оқибатида С.А.га жиддий жароҳат етмаган. Ҳозирда унинг аҳволи ўнгланмоқда. Яқин кунлар ичида фуқарога жавоб берилади, дейилади маълумотда.

#ёнғин #Яшнобод тумани