Сурхондарё вилояти Ангор туманидаги 3-сон қишлоқ оилавий поликлиникаси жорий йилнинг июн ойида капитал таъмирдан сўнг фойдаланишга топширилган бўлиши лозим эди. Агар туман ҳокимлигининг расмий муносабатида берилган ваъда ўз вақтида бажарилганда.
Жорий йил феврал ойида тумандаги Навшаҳар маҳалласи аҳлига хизмат кўрсатиб келган Ангор туманидаги 3-сон ҚОПни капитал таъмирлаш ишлари бошланади. Лойиҳа учун туман ҳокимлиги бюджетидан 1 млрд 400 млн сўм ажратилгани маълум қилинган. Аммо таъмирлаш ишлари ўз вақтида амалга ошмагач, ҳудуд аҳолиси ноқулайликлар сабабли ўз эътирозини билдирган.
Ангор туман ҳокимлиги аҳоли мурожаатига жавобан жорий йилнинг 2 май куни ҳокимлик Telegram-канали орқали расмий муносабат билдирган. Унда келтирилишича, ўша вақтда капитал таъмир 30 фоизга бажарилган ва бир ой муддатда иш якунланиши маълум қилинган. Орадан икки ой ўтди, аммо янги поликлиникадан дарак йўқ.
Поликлиника вақтинча маҳалла биносига кўчирилган, ҳозир ҳам ўша ерда фаолиятини давом эттирмоқда. МФЙ ходимлари ҳам, профилактика инспектори ҳам шу бинода ишлайди. 19 июн куни туман ҳокимлиги бу борада яна бир баёнот беради. Унда поликлиника қурилиши молиявий муаммо сабаб тўхтаб қолгани, лекин ишлар яна тиклангани айтилган. Қизиқ, 1,4 миллиард сўм пул ажратилган бўлса, яна қандай молиявий муаммо бўлиши мумкин?
«Биз ҳам сифатли тиббий хизмат олишга ҳақлимиз. Лекин ўзи ёрдамга муҳтож бу оилавий поликлиника одамларга қандай сифатли тиббий хизмат кўрсатсин? Бу ерга келганлар ҳозир даволанишдан кўра касаллик юқтириши эҳтимоли юқори», дейди навшаҳарликлардан бири.
Ангор тумани ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Шерали Мирзаев билан телефон орқали боғландик. У айни вақтда поликлиникани таъмирлаш учун маблағ йўқлигини маълум қилди. Мирзаевнинг айтишича, бу ҳақда вилоят ҳокимлигига хабар берилган.
Қизиқ, бундан икки ой аввал ҳокимлик ҚОПни капитал таъмирлаш учун 1 млрд 400 млн сўм ажратилди, бир ойда иш якунланади, деганда нимани назарда тутганди? Умуман, осонликча ваъда берилаётганда унинг ижроси, эртага сўралиши мумкинлиги ҳақида кимдир ўйлаб кўрганми?
Навшаҳар маҳалласи аҳолиси яна қанча вақт маҳалла биносида тиббий хизматдан «баҳраманд бўлади»? Бу ҳақда ҳозирча тайинли жавоб берадиган масъул йўқ. Лойиҳага ажратилган 1 млрд 400 млн сўмнинг тақдири эса ҳаммасидан ҳам муҳим. Ҳокимлик ажратилди, деб айтган бу пуллар қаёққа ғойиб бўлди экан?
Бу ишни суриштириш туман прокуратураси учун жиддий мавзу деб ўйлаймиз. Ахир солиқ тўловчиларнинг 1,4 миллиард сўм пули савол-жавобсиз йўқолиб қолиши керак эмас.
Исомиддин Пўлатов, Kun.uz мухбири.
