Бир қанча ҳудудларда ўқишга киритиш ва кўчириш билан боғлиқ фирибгарликларни содир этган шахсларга жиноий иш қўзғатилди

Бош прокуратура ҳузуридаги Иқтисодий жиноятларга қарши курашиш департаменти ҳамда ДХХ органлари томонидан ҳамкорликда мамлакат бўйлаб ўтказилган тезкор тадбирларда, фуқароларни ўқишга киритиш, кўчириш билан боғлиқ фирибгарликларни содир этган шахслар ҳамда талабани якуний назорат имтиҳонидан ўтказиб қўймоқчи бўлган декан ўринбосари ушланган.

Маълум қилинишича, Бош прокуратура ҳузуридаги департамент ҳамда ДХХнинг Чилонзор тумани бўлимлари томонидан ўтказилган тезкор тадбирда, фуқаро Б.А. ва бошқалар қўлга олинган. Улар, 7 300 доллар эвазига фуқаро А.ни Қирғизистондаги тиббиёт олийгоҳига ўқишга киритиб, кейинчалик юқори лавозимда ишловчи танишлари орқали ўқишни Андижон давлат тиббиёт институтига кўчириб беришини айтган. Сўнг олдиндан келишилган 7 300 доллар ҳисобидан 35,5 миллион сўмни олган вақтида ашёвий далиллар билан ушланган.

Худди шундай, Департаментнинг Юқори Чирчиқ туман бўлими ҳамда ДХХ Тошкент вилояти бошқармаси томонидан ўтказилган тезкор тадбирда, фуқаро Ш.И. ушланган. У фуқаролардан бирини Чирчиқ педагогика институтига контракт асосида ушбу институтда ишловчи танишлари орқали ўқишга киритиб қўйишни ваъда қилган. Сўнг олдиндан келишилган 3 000 доллар ҳисобидан 1 000 доллар олган вақтида ашёвий далиллар билан қўлга олинган.

Шунингдек, муқаддам 4 марта фирибгарлик жиноятлари учун судланган фуқаро Н.Т. фуқаро Т.нинг ўғлини ИИВ Академиясига танишлари орқали ўқишга киритиб қўйишга ишонтирган. Кейин эвазига 1 000 доллар олган вақтда Департаментнинг Музработ тумани бўлими ходимлари томонидан ашёвий далиллар билан ушланган.

Шу каби Департаментнинг Бухоро туман бўлими ҳамда ДХХ Бухоро вилоят бошқармаси томонидан ўтказилган тезкор тадбирда, фуқаро М.Қ. қўлга олинган. У, фуқаролардан бирининг ҳужжатларини transfer.dtm.uz сайтида рўйхатдан ўтказиб, Қозоғистондаги ОТМга бормасдан, бир йил ўқигани ҳақида сертификат ва транскрипт ҳужжатларини танишлари орқали тайёрлаб бериши эвазига 900 доллар олган вақтда ашёвий далиллар билан ушланган.

Бундан ташқари, Департамент ҳамда ДХХ Самарқанд вилояти бошқармаси томонидан ўтказилган тезкор тадбирда Самарқанд давлат чет тиллар институти факультет декани ўринбосари С.И. ушланган. У фуқаро Н.нинг ушбу институтда таълим олаётган қизини якуний назорат имтиҳонидан ўтказиб бериш эвазига 550 доллар олган вақтида ашёвий далиллар билан қўлга олинган.

Қайд этилишича, ҳозирда мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.