КХДРда ўзгача парад: махсус ҳимоя кийимлари ва газниқоблардаги одамлар колоннаси

Шимолий Корея коммунистик давлат ташкил этилганининг 73 йиллиги муносабати билан ҳарбий парад ўтказди. Унда баллистик ракеталар намойиш этилмади, лекин тўқ сариқ рангдаги ҳимоя комбинезонлари, газниқоблар ва бошқа тиббий респираторлардаги одамлар колоннаси олиб ўтилди.

Парадда шунингдек 2013 йилдан буён илк марта Ишчи-деҳқонлар Қизил гвардияси — КХДР фуқаролик мудофааси кучлари ҳам иштирок этган.

Парадда мамлакат етакчиси Ким Чен Ин ҳам иштирок этган.

Суратларда болалар даврасидаги анча озғин бўлиб қолган доҳийни кўриш мумкин. Кузатувчилар сўнгги ойларда жаноб Ким вазн ташлаганини қайд этишган; бунинг сабаби номаълум ва бунга ҳеч ким расман изоҳ бермаган.

Бу мамлакатда озиқ-овқат танқислиги юзага келгани билан боғлиқ бўлиши эҳтимолдан йироқ, лекин Шимолий Корея Covid-19 пандемияси даврида озиқ-овқат етишмовчилиги билан боғлиқ оғир муаммога дуч келган, шу туфайли кўплаб шимолий кореяликлар тўйиб овқатлана олишмаяпти.

Пайшанбага ўтар кечаси ўтказилган парадда  давлат нашрларида эълон қилинган суратларга кўра, ўт ўчириш машиналари ва тракторлар ҳам иштирок этган, шунингдек салют отилган.

Парадда махсус кийимдаги одамлар ҳам ўтгани мамлакатда Covid-19 тарқалишининг олдини олиш учун махсус кучлар тузилганини англатиши мумкин.

Таҳлил
Лора Бикер, BBC’нинг Сеулдаги корреспонденти

Шимолий Кореяда парадлар икки мақсадга хизмат қилади.

Баъзида бу янги ҳарбий техникалар ва баллистик ракеталарни ташқи дунёга намойиш этиш вазифасини бажаради.

Аммо парадлар асосан айниқса қийин даврларда ички сиёсатни мустаҳкамлаш мақсадида ўтказилади. Бу жанговар руҳни кўтариш ва фуқароларга ҳарбий қудрат кучини мушакларнинг кучли овози остида кўрсатиб қўйиш воситасидир.

Парадда махсус ҳимоя кийимларидаги одамлар кўриниш бериши Пхеньян ўз фуқароларига Covid-19 тарқалишига қарши курашни давом эттираётганини кўрсатишни истаганини билдиради - ҳолбуки Шимолий Корея расман вирусдан зарарланиш ҳолатини қайд этмаган.

Пхеньян жорий йил бошидан буён уч марта парад ўтказиб улгурди, бу ҳатто Шимолий Корея учун ҳам кўплик қилади.

Пойтахтда пандемия даврида ниқобсиз кўп миқдордаги одам тўпланиши, ҳали мамлакатда бирор киши эмланмаган ва вакцина ҳам бўлмаган шаротда кам хавф туғдирмайди.

Афтидан, Ким Чен Ин таваккал қилишга арзийди, деб ҳисоблаган.

Хитой давлат нашрлари хабарларига кўра, Хитой раҳбари Си Цзиньпин Кимга табрик номаси йўллаган.

Хитой - Шимолий Кореянинг азалий иттифоқчиси бўлиб, мамлакатга озиқ-овқат, кўмир ва ёқилғи етказиб беради.

Аммо 2020 йил январида Шимолий Корея коронавирус кириб келишининг олдини олиш мақсадида чегараларини ёпганидан кейин икки давлат ўртасидаги савдо ҳажми кескин қисқариб кетади. Бундан ташқари, Пхеньян Хитойдан юборилган уч миллион доза вакцинани қайтарди.

Жаҳон соғлиқни сақлаш ташкилоти маълумотига кўра, 19 август ҳолатига кўра Шимолий Кореяда Covid-19га чалиниш билан боғлиқ бирорта ҳолат қайд этилмаган, лекин кузатувчилар бундай бўлиши эҳтимоли деярли йўқлигини айтиб келишади.

ЖССТнинг ҳафталик ҳисоботига кўра, 37291 киши, жумладан тиббий ходимлар ва гриппни эслатувчи белгилар кузатилган одамлар тест қилинган, аммо бирорта мусбат ҳолат қайд этилмаган.

Ким Чен Ин мамлакатда озиқ-овқат етишмовчилиги юзага келганини тан олган. Август ойида Шимолий Кореяда озиқ-овқат танқислиги туфайли аҳолига армия захираларидан гуруч тарқатилаётгани ҳақида хабарлар берилганди. Инсонпарварлик ташкилотлари одамлар очликдан ўлаётгани ва иқтисодиётнинг барқарор эмаслиги ҳақида ҳисоботлар беришган.

Лекин иқтисодий қийинчиликлар КХДР ядро дастурига таъсир кўрсатмаган кўринади: август ойида БМТнинг атом энергияси бўйича агентлиги Пхеньян яна Йонбен реакторини ишга туширган бўлиши мумкинлигини маълум қилди. Йонбен Шимолий Кореядаги 1964 йилда ташкил этилган йирик ядро объект бўлиб, у ерда қуроллар учун қўлланадиган плутоний ишлаб чиқарилади.