Кремль Путин ва Зеленский учрашуви ўтказилишига тўсқинлик қиладиган омилни маълум қилди

Песковнинг сўзларига кўра, агар Киев Қримнинг кимга тегишлилиги масаласини кўтаришга қарор қиладиган бўлса, икки мамлакат президентлари учрашуви ўтказилмайди.

Фото: Getty Images

Агарда Украина томони музокараларда Қримнинг кимга тегишлилиги масаласини кўтаришни режалаштирадиган бўлса, Россия ва Украина президентлари Владимир Путин ва Владимир Зеленский ўртасида учрашув ўтказилмайди. Бу ҳақда Россия президенти матбуот котиби Дмитрий Песков маълум қилди.

«Табиийки, Қримни муҳокама қилиш имконсиз», — деди Песков.

У шунингдек, Путин украиналик ҳамкасби билан Донбассдаги уруш ва тинчлик масаласини ҳам муҳокама қилмоқчи эмаслигини айтди. Унинг сўзларига кўра, Россия бу низо ичида йўқ.

Икки мамлакат президентлари ўртасидаги учрашув масаласини муҳокама қилиш шу йилнинг баҳорида бошланганди. Ўшанда Зеленский Путин билан «Донбасснинг исталган нуқтасида» учрашишга тайёрлигини айтганди. Бунга жавобан Путин Зеленскийни Москвага таклиф қилганди. Апрелда Зеленский «исталган жойда» учрашишга тайёрлигини, 1 сентябр куни эса унинг матбуот котиби Сергей Никифоров Киев «исталган вақтда» музокараларга тайёрлигини маълум қилди.