Ушбу ҳафта ўртасида кўҳна қитъада еврокубок учрашувлари ўтказилади. Жумладан, бугун – 28 сентябрь сешанба оқшомида мухлисларни Чемпионлар лигаси 2-тур ўйинлари кутмоқда. Дастлабки кунги баҳсларда юлдузли «ПСЖ»нинг «Манчестер Сити»га қарши тўқнашуви, «Милан» - «Атлетико» ҳамда Жасур Яхшибоевнинг «Реал»га қарши «Сантьяго Бернабеу»даги ўйини барчанинг диққат марказида бўлади.
«Миллионерлар жанги»
Турнинг марказий қарама-қаршилиги Парижда ўтади. Пеп Гвардиола ва Мессининг йўллари тўқнаш келади. Ушбу ўйин қайдномасидан ўрин олган аргентиналик форвард «Сити»га қарши баҳсда Неймар ва Мбаппе билан трио ҳосил қилиши кутилмоқда. «Манчестер Сити» ўтган мавсумда Чемпионлар лигаси яримфиналида «ПСЖ»ни турнирдан чиқариб юборган эди. Шундай экан, қатарлик ва амирлик шайхларга тегишли клублар ўртасидаги баҳсда Париж клуби реванш олиш имкониятига эга.
Мезбонлар устози Почеттино «Сити»га қарши Серхио Рамос ва Анхель Ди Марияни майдонга тушира олмаса, Гвардиолада ҳам йўқотиш бор – Гундўған ва Зинченко жароҳат сабабли Парижга бормаган.
7 йил ўтиб «Сан-Сиро»да ЕЧЛ мадҳияси янграйди
«Милан» клуби 7 йиллик танаффусдан кейин «Сан-Сиро»да ЕЧЛ мадҳияси остида майдонга тушади. Эътиборлиси, миланликлар бу турнирдаги сўнгги учрашувни ўз стадионларида 2014 йилнинг февралида «Атлетико»га қарши ўтказишганди. Ўшанда Кака, Марио Балотелли, Одил Таарабт ва Майкл Эссьен етакчилигидаги «россонерлар» «ҳиндулар»га ютқазишган. 7 йиллик танаффусдан сўнг Стефоно Пиоли шогирдлари ўша мағлубият учун ўч олиш имкониятига эгалар.
Молдованинг «Шериф» клуби Мадридга гуруҳ пешқадами сифатида ташриф буюрди. «D» гуруҳи 1-турида «Шериф» «Шахтёр»дан устун келган бўлса, «Реал» Италияда «Интер»ни мағлуб этганди. «Шериф» бу турда Мадридда ҳам сенсация қайд этиб, Испаниядаги тарихий очкосини қўлга кирита оладими?
«Сантьяго Бернабеу»дек буюк стадионда тўп суришнинг ўзи биз учун катта байрам. Фантастик атмосферада рақибга қарши муносиб қаршилик кўрсатишга интиламиз. «Реал»ни ҳурмат қиламиз, аммо улардан асло қўрқаётганимиз йўқ», - деди клуб бош мураббийи Юрий Вернидуб ўйиндан аввал.
Мавзуга оид
УЕФА расмий сайти жамоаларнинг тахминий таркибини келтирган. Унга кўра, Жасур Яхшибоев «Шериф»нинг асосий таркибига киритилиши тахмин қилинган. 24 ёшли ҳужумкор яримҳимоячи «Реал»га қарши майдонга тушса, у «Сантьяго Бернабеу»да тўп сурган ўзбекистонлик иккинчи футболчига айланади. Ҳозиргача фақатгина Максим Шацких Киевнинг «Динамо»си таркибида Мадридда майдонга тушган. Шундай экан, тарихий ўйинга айланиши мумкин бўлган «Сантьяго Бернабеу»даги учрашувни ўтказиб юборманг.
Қуйида сешанба оқшомида ўтадиган ўйинлар анонси ва тўртта гуруҳдаги 8та учрашувнинг тахминий таркиблари билан танишинг:
