«Нидерландияда бундай майдонга итларни ҳам сайрга олиб чиқишмайди». Питер Ҳюистра Жиззахдаги майдон ҳолати ва ҳакамликни танқид қилди

Суперлига 23-тури доирасидаги «Сўғдиёна» - «Пахтакор» (1:0) учрашувидан кейин меҳмонларнинг нидерландиялик бош мураббийи Питер Ҳюистра Суперлигадаги майдонларнинг ҳолати, ҳакамларнинг хатоси ва уларнинг ўйинларга қандай тайинланиши ҳақида аччиқ гапларни гапирди.

«Бугунги ўйинда менга ёқмаган икки жиҳат бор. Адашмасам, икки тур олдин шу ҳакам Қўқондаги ўйинни («Қўқон-1912» - «Пахтакор» 4:2) бошқариб борганди. Уч тур ичида иккинчи марта бир ҳакамнинг «Пахтакор»нинг сафардаги ўйинига тайинланганини тушунмаяпман.

Иккинчи жиҳат, бу Жиззахдаги жуда ёмон аҳволдаги майдон. Бу шунчаки ёмон эмас, жуда ва жуда ёмон майдон! Ўхшатиш қўполроқдир, аммо Нидерландияда бундай майдонга итларни ҳам сайрга олиб чиқишмайди! Мухлислар пешқадамлар ўртасида чиройли футбол кўрмадик, деб эътироз билдириши мумкин. Аммо аввал майдонга қараш керак. Бундай майдонда сифатли ўйин кўрсатиб бўлмайди. Майдон яхши бўлмаса, ҳеч қачон сифатли ўйин ва ўсиш бўлмайди. Майдонлар Суперлига юзи ҳисобланади. Ўтган мавсум майдонлар ҳолати яхшироқ эди.

Айтайлик, «Турон» клубининг майдони ажойиб, барча шароитлар бор. Аммо бу клуб нега кўп очко ололмаяпти биласизми? Чунки улар сафар ўйинларида ёмон майдонда ўйнашади.

Суперлигада олдинда яна учта ўйинимиз бор. Чемпионликни қўлга киритиб бўлдик ва энди ёшларга кўпроқ имконият берамиз.

Ҳакамлик? Умумий даража ёмон эмас. Аммо ҳозир VAR бор, негадир ҳамма ўйинда ҳам бу иштилмайди. Бугунги ўйинда VAR бўлганида ҳужумчимиз Матичнинг голи ҳисобга олинарди. VAR йўқлиги учун бош ҳакам томошабинларнинг таъсирига тушиб қолди, мезбон футболчилари майдонга йиқилса мухлислар таъсири остида жарима тўпларини берди.

Мотивация? Чемпионликка эришган бўлсак-да, жамоамдаги футболчилар шунчаки футболни севишади. Шунинг ўзи мотивация.

«Сўғдиёна»ни бу йил мағлуб эта олмаган бўлсак-да, улар биздан кучли деб ўйламайман. Мусобақа жадвали буни айтиб турибди, футболда бир рақибни икки марта ҳам мағлуб эта олмаслик учраб туради. Ҳали кубокда уларга қарши яна тўқнаш келишимиз мумкин. Ўшанда кучли эканлигимизни кўрсатармиз», - дея «Пахтакор» бош мураббийи Питер Ҳюистра сўзларини келтирмоқда Tribuna.uz мухбири.

Эслатиб ўтамиз, бунгача «Локомотив» клубининг португалиялик бош мураббийи Микаэль Секейра «Қўқон-1912» жамоасига қарши мағлубиятли ўйиндан (1:2) кейин ҳакамларнинг адолатсиз қарорлари ва майдонлар ҳолатини танқид қилган эди.