Фуқаролар ўз уйларининг биқинида янги кўп қаватли уй қад ростламаслиги учун ўзлари курашишга мажбур бўлмоқдалар.
Kun.uz шу йилнинг январ ойида Тошкент марказидаги Абай кўчасига туташ 13-мавзе, 11– ва 13-уйлар орасида кўп қаватли турар жой биноси қурилиши билан боғлиқ можароли вазиятни ёритган эди.
Орадан бир ой ўтиб, қурилиш тўхтатилгани ва тадбиркорга ер ажратиш тўғрисидаги ҳоким қарори бекор қилингани ҳақида хабар берилганди.
Қурувчи ташкилот 2018 йилдан буён баҳс-мунозараларга сабаб бўлаётган ҳудудни осонликча тарк этмоқчи эмасга ўхшайди. Сабаби, ҳозирга қадар ўраб олинган ҳудуд аҳолига қайтариб топширилган эмас.
Маҳалла аҳли эса ҳамон қурилишга мутлақо қарши.
“Бу ерда кўп қаватли уй қурилиши Ўзбекистон қонунчилигига мутлақо зид. Ҳеч ким бу ерда турадиган аҳоли билан маслаҳат қилмаган. Бу – ўзбошимчалик билан олиб борилаётган қурилиш.
Президент бир ой олдин: “Тошкентда энди қурилиш қилмаймиз, ташқарига чиқамиз” деб айтди. Булар эса қурмоқчи. Бу қанақаси? Давлат раҳбарига қулоқ солмасдан, фақат ўз манфаатини кўрадиган одамларга қандай қараш мумкин? Қонунларимиз ишламаяпти, айтган гапимиз ҳаётга татбиқ қилинмаяпти”, – дейди Раҳимжон Султонов.
“Кўпдан бери шу қурилишни тўхтатишга ҳаракат қилиб келяпмиз. Ёнимизда мактаб бор. Бу ерга кўплаб машиналар ўқувчиларни олиб келади”, – дейди яна бир фуқаро Гули Шукурова.
Шу ҳудудда яшовчи Муҳаббат Алланазарова ҳам кўп йил умри ўтган масканида бўлаётган бу қурилишга норозилигини яшириб ўтирмади.
“Уч йилдан бери биз учун байрам ҳам, дам олиш куни ҳам йўқ. Биз ҳар байрам, ҳар дам олиш куни шу майдонга чиқамиз ва қурилишга қарши курашиб келамиз. Журналист, блогерлар ҳам биздан чарчади. Улар ҳам бу ерда кўп марта бўлишган.
Болаларимизнинг майдончасини қайтариб беришингизни сўраймиз. Ҳозир ўйнаш учун уларда жой йўқ. Кекса ота-оналаримизга ҳам ўтириб дам олиш учун жой йўқ. Бу ерда ҳамма жой машиналар билан банд”, – дейди у.
2021 йил январ ойида Шайхонтоҳур туман ҳокимининг ўринбосари Жаҳонгир Каримов аҳолига қурилиш тўхтатилишини маълум қилган.
Ҳатто прокурор протестига асосан шаҳар ҳокимининг 2021 йил 14 апрелдаги қарори билан мазкур ерни тадбиркорга ажратиш ҳақидаги қарор бекор қилинган.
Маълум бўлишича, тадбиркор ҳокимнинг ушбу қароридан норози бўлиб маъмурий судга мурожаат қилган. Тошкент туманлараро маъмурий суди 2 июл куни аризани қаноатлантириб, шаҳар ҳокимининг 2021 йил 14 апрелдаги қарорини ҳақиқий эмас, деб топган.
Эслатиб ўтамиз, “...Кўп қаватли уйлар оралиғидаги бўш жойларда қурилишлар қилиш, мораторий эълон қилинганига қарамасдан, дарахтларни кесиш, яшил ҳудудларни камайтириш ҳолатлари кўпчиликни ранжитмоқда. Баъзи раҳбарларнинг бепарволиги ёки манфаатпарастлиги туфайли турар жой мавзеларида одамлар сайр қиладиган, спорт билан шуғулланадиган, фарзандлари билан бирга тоза ҳавода дам оладиган очиқ жойнинг ўзи қолмаяпти”, – деганди Шавкат Мирзиёев “Янги Ўзбекистон” газетасига берган интервюсида.
19 октябр куни давлат раҳбари “Янги Тошкент” концепцияси бўйича режаларни очиқлар экан, Тошкентда кўп қаватли уй-жойлар орасидаги бўш ерларда ҳар қандай қурилиш қилишга чек қўйилишини маълум қилди.
“Тошкент шаҳрида кўп қаватли уй-жойлар орасидаги бўш ерларда ҳар қандай қурилишлар қилишга чек қўйилади. Кўп қаватли уй-жойларга туташ ҳудудлар фақатгина ушбу уй мулкдорларига доимий фойдаланиш учун бириктирилади”, – деди президент.
Кўп қаватли уйлар оралиғидаги бўш жойларда олиб борилган қурилишлар президент Шавкат Мирзиёевнинг танқидига учраганига қарамай, ҳамон бундай қурилишлар давом этадиган кўринади.
Воқеалар ривожини кузатишда давом этамиз.
Аббос Салайдинов,
Kun.uz мухбири.
Тасвирчи ва монтаж устаси – Абдуқодир Тўлқинов.
