АҚШ Оролбўйи минтақасига инсонпарварлик юкининг навбатдаги партиясини юборади 

Ўзбекистоннинг АҚШдаги элчихонасидан маълум қилишларича, ушбу келишувни амалга ошириш доирасида Оролбўйи ҳудуди учун мўлжалланган ўн контейнер инсонпарварлик юкининг тўрт контейнери яқин кунларда Ўзбекистонга жўнатиш учун тайёрлаб қўйилди, деб хабар бермоқда «Дунё».

Бу ҳақда элчи Жавлон Ваҳобов ва «Project C.U.R.E.»нинг хорижий ҳукуматлар билан ишлаш бўйича директори Мелисса Эспости ўртасида бўлиб ўтган мулоқот чоғида маълум қилинди. Америка вакилларининг таъкидлашича, инсонпарварлик юки Қорақалпоғистонга декабрь ойида етказилади.

М.Эспостининг сўзларига кўра, «Project C.U.R.E.» Оролбўйи минтақасининг кўп сонли аҳолисини қўллаб-қувватлаш учун хайрия лойиҳасини амалга оширишга қарийб икки йил тайёргарлик кўрди. «Қорақалпоғистон аҳолиси учун беғараз ёрдам юкини жўнатишнинг айни фурсати етиб келди», деди у. 

«Project C.U.R.E.» вакили Қорақалпоғистондаги 24 та тиббиёт муассасаси катта эҳтиёж сезаётган тиббиёт асбоб-ускуналар ҳақида хабардорлигини маълум қилди. Шу боис юкнинг дастлабки тўртта контейнери биринчи навбатда ушбу тиббиёт муассасаларига тақдим этилади.

Мамлакат дипломатия миссияси маълумотига кўра, юк таркиби электрогидравлик операция столлари, гемодиализ аппаратлари, ультратовуш тадқиқот ускуналари, рентген сканерлари, чақалоқлар учун интенсив терапия инкубаторлари, дефибрилляторлар, лаборатория анжомлари, тиббий кислород баллонлари ва бошқа асбоб-ускуналардан ташкил топган.

«Project C.U.R.E.» нодавлат нотижорат ташкилоти 1987 йилда ташкил этилган бўлиб, у ривожланаётган мамлакатларга замонавий тиббий асбоб-ускуналар етишмовчилигини бартараф этишда ёрдам беради. ННТ АҚШнинг 6 штатида ўзининг йирик тарқатиш марказларига эга. 

Жорий йил май ойида «Project C.U.R.E.» лойиҳаси доирасида Қорақалпоғистон Республикаси соғлиқни сақлаш ташкилотларига тиббий материаллар, асбоб-ускуналар, мобиль вентиляторлар ва тиббий буюмларни ўз ичига олган инсонпарварлик ёрдамининг биринчи партияси жўнатилган эди.