Мадридда «Эль-Класико», Рим ва Лондонда дерби, Жеррард Артетага қарши. Ҳафта ўйинлари анонси

Футбол мухлиси ёздаёқ қўлига кучли бешлик лигалари тақвимини олганда, албатта, «Эль-Класико»лар қайси кунлари бўлиб ўтишини бир қараб олади. Ўша кун келди. Наврўз байрамига ўтар кечаси «Реал» ва «Барселона»нинг навбатдаги тўқнашувини кузатишимиз мумкин. Десертга эса бугун ва эрта бизни Рим дербиси ва АПЛдаги икки қизиқарли учрашув ҳам кутиб турибди.

Дарвоқе, инглиз футболи классика шайдолари учун ҳам совға бор. 70-йиллар нафақат Англия, балки Европада ном қозонган икки клуб – «Ноттингем Форест» ва «Ливерпуль» Англия кубоги чоракфиналида тўқнаш келадилар. Ёқимли иштаҳа.

АСТОН ВИЛЛА – АРСЕНАЛ (19 март, 17:30)

«Арсенал» ўтган турда «Ливерпуль»дан мағлубиятга учраган бўлса-да, Чемпионлар Лигасига йўлланма берувчи тўртинчи ўрин учун асосий фаворитлигини сақлаб турибди ва асосий таъқибчилари «Тоттенҳэм» ва «Манчестер Юнайтед»ни йўқотилган очколар бўйича мос равишда 6 ва 7 очкога ортда қолдирмоқда. Аммо ўша захира ўйинларда ғалаба қозониш ҳам керакки, бугунги устунлик амалда ҳам ўз исботини топсин. Кейинги икки ўйинни Артета шогирдлари сафарда «Астон Вилла» ва «Кристал Пэлас»га қарши ўтказади. Айтиш мумкинки, айниқса, ўз майдонида рақибга қийинчилик туғдирадиган жамоалар.

Жерард шогирдлари ўтган турда «Вест Ҳэм» майдонида мағлубиятга учраган бўлишса-да, жуда яхши спорт формасига кириб олганлар. Ундан олдинги уч ўйинни умумий 9:0 ҳисобида ғалабалар билан якунлаган эдилар. Бунинг устига «виллаликлар» айнан «Арсенал»га қарши ўйинларда ҳам етарлича муносиб ҳаракат қила оладилар. Охирги 20 ўйиндан атиги 5тасида ғалаба қозонган бўлишса-да, масалан, Бирминҳэмда ўтган сўнгги икки учрашувда бир хил – 1:0 ҳисобида устун келишган. Ўтган мавсумда эса «Вилла» ҳатто «Эмирайтес»да 3:0 ҳисобида йирик ғалабани қўлга киритган. Биринчи даврадаги ўйин эса 3:1 ҳисобида «тўпчилар»нинг ишончли ғалабаси билан якунланган эди. Яна бир қизиқ факт – ушбу жамоалар ўртасида бўлиб ўтган охирги 13 тўқнашувда атиги бир марта дуранг ҳисоби қайд этилган, холос.

Таркиблар борасида ҳар икки жамоада деярли йўқотишлар йўқ. Ўтган турда Люка Дин учрашув бошидаёқ жароҳат олди ва алмаштирилганди. Маълум бўлишича, ҳимоячи камида икки ҳафта майдонга туша олмайди. Яъни миллий жамоалар иштирокидаги танаффусдан сўнг, франциялик футболчини таркибда кўришимиз мумкин бўлади. Меҳмонлар сафида фақатгина Такеҳиро Томиясунинг майдонга тушиши сўроқ остида. Аммо айтиш мумкинки, Седрик Соареш таркибни унинг ўрнига жуда яхши шаклда тўлдира оляпти ва япониялик ҳимоячининг ўйнай олмаслиги катта йўқотиш бўлмаслиги керак.

Ўз вақтида «Ливерпуль» ва «Эвертон» ўртасида кечган шиддатли дербиларда жамоаларни сардорлик боғичи остида майдонга олиб тушган Жеррард ва Артетанинг тренерлик борасидаги кураши албатта, қизиқ бўлса керак. Бу биринчиси, зеро юқорида тилга олинган биринчи давра учрашувида «Вилла» бош мураббийи Дин Смит эди.

ТОТТЕНҲЭМ – ВЕСТ ҲЭМ (20 март, 17:30)

Бу ҳафтада АПЛ қисман дам олади, чунки бир қатор жамоалар Англия кубоги чорак финалида майдонга тушади. Премьер-лига кечаги «Вулверҳэмптон» – «Лидс» ўйинини қўшмаганда, атиги уч ўйинни ҳавола қилади. Лекин шундай бўлса-да, мухлисларни жуда қизиқ тўқнашувлар кутиб турибди. Масалан, Лондон дербиси.

Албатта, Лондон дербиси деганда биз кўпроқ «Арсенал», «Тоттенҳэм» ва «Челси»нинг ўзаро тўқнашувларини тушунишга ўрганиб қолганмиз, лекин сўнгги йилларда «Вест Ҳэм» ҳам бу қаторга кириб олмоқда. Мойес шогирдларининг нафақат ўзаро ўйинларни муаммо туғдириш, балки турнир нуқтаи назаридан ҳам ҳамшаҳарларига рақобат қилиши катта натижадир. Ҳозирда «Вест Ҳэм» ва «Тоттенҳэм» бир хил – 48тадан очко тўплаб, турнири жадвалида олтинчи ва еттинчи ўринларни эгаллаб туришибди. Конте шогирдларида бир ўйин захираси бор, лекин бу ўйинда мезбонлар ғалаба қозонишса, табиийки, бу устунлик ҳам йўққа чиқади.

«Вест Ҳэм» бу мавсумда деярли барча топ жамоаларни енга олди. «Челси» ва «Ливерпуль»ни АПЛда, Манчестер жамоаларини эса Лига кубогида мағлубиятга учратди. «Тоттенҳэм»га қарши биринчи давра ўйинида ҳам Мойес шогирдлари ғалаба қозонишганди. Демак кучли рақибларга қарши «Вест Ҳэм» қандай ўйнашни жуда яхши билади. Умуман олганда, сўнгги йилларда «Тоттенҳэм» анча юқори ўринларда юрди, чемпионлик учун курашди, Чемпионлар Лигаси финалига чиқди. Қизиғи, мана шу йилларда ҳам айнан «Вест Ҳэм» рақибига муносиб бўлиб келган. Жамоалар ўртасидаги охирги 25 ўйиннинг 11тасида «Тоттенҳэм», 10тасида эса «Вест Ҳэм»нинг қўли баланд келганига бироз ишониш ҳам қийин, тўғрими?

Таркиблардаги йўқотишларга келсак, мезбонлар сафида Танганга, Скип ва Сессеньон майдонга туша олишмайди. Уларнинг ўрнини тўлдириш у қадар қийинчилик туғдирмаса кераг-у, лекин «Вест Ҳэм»нинг таркибдаги муаммолари бироз жиддий. Ҳимоя чизиғи вакиллари Огбонна ва Соуфал ўйнай олмайди, айниқса, сўнгги ойларда ҳужум чизиғида ҳақиқий етакчига айланиб қолган Боуэннинг йўқлиги ҳам кўпроқ билинса керак. Бундан ташқари, «Вест Ҳэм» ҳафта ўртасида Европа Лигасида қийин учрашув ўтказди – «Севилья»га қарши ўйинда қўшимча таймларда ҳам куч синашишга мажбур бўлди. Яъни Мойес йигитлари жисмоний томондан ҳам рақибга нисбатан кучсизроқ кўринишлари турган гап. 

РОМА – ЛАЦИО (20 март, 22:00)

Ўтган турда «Рома»нинг дуранги ва охирги икки ўйинда «Кальяри» ва «Венеция» устидан «Лацио»нинг ғалабалари Рим қарама-қаршилигида Сарри шогирдларини фаворитга айлантириб қўйди. Гап турнир жадвали ҳақида бормоқдаки, «Лацио» сўнгги турларда нафақат «Рома» ва «Фиорентина», балки «Аталанта»ни ҳам қувиб ўтиб, 5-ўринга жойлашиб олди. Моуриньо шогирдлари эса жуда қийин даврларни бошдан кечирмоқда, очколар катта қийинчилик билан қўлга киритиляпти. Ҳатто Конференциялар кубогида ҳам осон бўлмади: «Витесс»га қарши ўйиннинг сўнгги дақиқаларида киритилган голгина жамоани кейинги босқичга олиб чиқди. Демак бу томондан ҳам «Рома»да муаммолар бўлиши табиий – римликлар пайшанба оқшомида еврокубокда майдонга тушишди. Дербида бу ҳам ўз сўзини айтиши ва «Лацио»га жисмоний курашда устунлик тақдим этиши мумкин.

Жамоалар бир стадионда тўп сўришса-да, айнан дербиларда 9 ўйиндан бери расман мезбон сифатида қайд этилган жамоанинг ютқазмаётгани эътиборга молик жиҳат. Охирги марта тўрт йил олдин апрель ойида «Лацио» меҳмон сифатида қатнашган ўйинда 3:1 ҳисобида устун келганди. Умуман олганда, охирги 24 дербида ҳам кучлар тенг – ҳар икки жамоа 9тадан ўйинда ғалаба қозониб, 6 учрашувда муроса кўчаси танланган. Биринчи даврадаги ўйин эса ёдингизда бўлса керак, «Лацио»нинг 3:2 ҳисобидаги қийин ғалабаси билан якунланганди.

Таркибларга келсак, «Рома»да йўқотишлар йўқ. Леонардо Спинацолланинг эса таркибдан четда эканига ўрганиб кетдик. Аммо маълум бўлишича, футболчи машғулотларга қайтиш арафасида ва келаси ойдан, мавсумнинг муҳим паллаларида Моуриньога ёрдам бериши мумкин. Меҳмонлар сафида эса Стефан Радуда жароҳат бор. Маттиа Дзакканьи эса «Венеция»га қарши ўйинда навбатдаги сариқ карточкасини олди ва ушбу ўйинга дисквалификация қилинди.

РЕАЛ – БАРСЕЛОНА (21 мартга ўтар кечаси, 01:00)

Тасаввур қилинг, яхши спорт формасига кириб олган «Барселона» «Бернабеу»да «Реал»ни мағлубиятга учратади. Ўртадаги фарқ 12 очкога қисқаради ва Хави шогирдларида қўшимча ўйин ҳам бор. Яъни йўқотилган очколар ўртасидаги фарқ 9 очкогача қисқаради. Олдинда яна 10 тур бор, «Реал» ҳали Вигога, Севильяга сафар қилади, «Атлетико» майдонида ҳам ўйини бор. Бунинг устига Чемпионлар Лигасида «Челси» билан тўқнашувлар кутиб турибди. Асосан бир нечта етакчи футболчининг маҳоратига таянган мадридликлар Ла Лигадаги устунликларини ҳозиргидек сақлаб тура оладими? Умуман чемпионатга интрига қайтиши мумкинми?

Ҳазил. Бу ҳақида ўйлашга ҳали эрта, шунчаки, навбатдаги «Эль-Класико»га сизни қизиқтиришга уриниб кўрдик. Аслида эса бундай уринишлар ўринсиз, зеро «Реал» ва «Барселона» тўқнашуви турнирдаги ҳолат, жамоаларнинг формасидан қатъи назар нафақат Испаниянинг, балки дунёнинг назарида турадиган марказий тўқнашув сифатида қолаверади. Бу сафаргиси ҳам истисно эмас.

Албатта, биринчи абзацдаги фикрларга ҳам бироз ўрин бор. Ростан ҳам «Барселона» жуда яхши спорт формасига кириб олди, муҳими, жуда осон гол ура олишмоқда. Ла Лигада кучли учликка қайтишди, Европа Лигасидаги кураш давом эттирилмоқда. Барча мусобақалардаги ўзаро ўйинларни ҳисобга олганда, қаторасига 5 ўйиндан бери «Реал» ғалаба қозонмоқда, «Барселона»нинг ғалабасиз серияси 6 ўйинга етди – бу қора чизиқни кесиб ўтиш учун Хави учун айни палла эмасми?

Таркиблар борасида ҳамон «Барселона»да йўқотишлар бисёр. Фати, Умтити, Роберто, Дест каби футболчиларда жароҳат бор, Нико Гонгсалес дисквалификацияга эга. Лекин буларнинг таркибдан четда эканига ўрганиб қолдик, «Барселона» юқорида тилга олинган муваффақиятли юришларини амалга оширганда ҳам бу футболчилар сафда эмасдилар. Қаҳрамонлар бошқа.

Аксинча, «Реал»да лазарет у қадар тўла бўлмаса-да, Бенземанинг кичик жароҳати жиддий таъсига эга бўлиши мумкин. Франциялик ҳужумчи охирги 5 ўйинда «Реал» киритган 14 голнинг 12тасида бевосита иштирок этди. «Алавес», «Райо», «Сосьедад», «ПСЖ» ва «Мальорка»га қарши ўйинларда Бензема 8 гол урди ва 4 маротаба шерикларига голли узатмани амалга оширди. Мана шундай даражада жамоа ўйинига таъсири бўлган футболчининг Класикода майдонга туша олмаслиги жуда катта йўқотиш. Бензема жароҳатига қарамай, Франция миллий жамоасининг навбатдаги йиғинларига жалб қилинди. Демак унинг ҳолати кутилганидан енгилроқ ва у ҳатто «Барселона»га қарши ўйинга ҳам тайёр бўлиши эҳтимоли бор.

«Барселона» учун эса жамоанинг пайшанба куни Туркияда майдонга тушиб қайтгани ўз салбий таъсирига эга бўлиши мумкин. «Галатасарой»га қарши ўйинда каталонияликлар деярли асосий таркибда майдонга тушишди. «Реал» эса ўз ЕЧЛ учрашувини ундан олдинги ҳафта ўтказиб олганди.

БОШҚА ЎЙИНЛАР

19 март. НАПОЛИ – Удинезе (19:00), ИНТЕР – Фиорентина (22:00), Мидлсбро – ЧЕЛСИ (22:15), БАВАРИЯ – Унион Берлин (22:30), Кальяри – МИЛАН (20 мартга ўтар кечаси, 00:45), (Райо Вальекано – АТЛЕТИКО (20 мартга ўтар кечаси, 01:00)

20 март. Монако – ПСЖ (17:00), ЮВЕНТУС – Салернитана (19:00), Саутҳэмптон – МАНЧЕСТЕР СИТИ (20:00), Ноттингем Форест – ЛИВЕРПУЛЬ (23:00), Кёльн – БОРУССИЯ Д (23:30).