Хитойда барча давлат органлари ва компанияларидаги импорт компютерлар маҳаллий компютерларга алмаштирилади

Хитой ҳукумати давлат органлари ва корпорацияларидан икки йил ичида импорт компютерларни маҳаллий ишлаб чиқарувчилар маҳсулотларига алмаштиришни талаб қилди. Бу ҳақда Bloomberg ўз манбаларига таяниб хабар берди.

Ходимлардан хорижда ишлаб чиқарилган компютерларни топшириш сўралган. Уларнинг ўрнига Хитойда ишлаб чиқарилган, маҳаллий операцион тизимда ишлайдиган компютерлар берилади, деган манбалар. Қайд этилишича, биргина маҳаллий ҳукумат миқёсида 50 миллионга яқин компютерни алмаштиришга тўғри келади.

Хитойнинг бу қарори АҚШнинг HP ва Dell компаниялари савдосига бевосита таъсир кўрсатади. Улар Хитой бозорида сотувлар бўйича маҳаллий Lenovo компаниясидан кейинги ўринларда туради.

Ушбу хабардан сўнг Lenovo ва Хитойнинг бошқа технологик компаниялари акциялари нархи кўтарилган.