Самарқанддаги ноодатий меҳмонхонани бузишга хулоса берилди. Тадбиркор қурилишга 3 миллион доллар сарфлаганини айтмоқда

Самарқанд тумани Жўйисой маҳалласи, Самарқанд дарвоза кўчасида жойлашган ноодатий кўринишдаги бинони бузиш бўйича хулоса берилган. Бу ҳақда Қурилиш вазирлиги расмий сайтида эълон қилинди.

Хабарда айтилишича, қурилиш уни рухсат берадиган ҳужжатларсиз амалга оширилган.

«Самарқанд вилояти Самарқанд тумани «Жўйисой» маҳалласида фуқаро Ф.Ҳалилов томонидан ўз уйининг бир қисмини бузиб, 21,4×12,6 метр ўлчамдаги 11 қаватли 2 қават ертўлали меҳмонхона биноси қурилиши ҳеч қандай қурилишга рухсат берувчи шаҳарсозлик ҳужжатлари расмийлаштирилмасдан амалга оширилган.

– Қурилишга рухсат берувчи Самарқанд тумани ҳокимининг қарори ёки туман қурилиш бўлимининг рухсатномаси мавжуд эмас;

– Aрхитектура режалаштириш топшириғи (AПЗ) мавжуд эмас;

– Муҳандислик геологияси, лойиҳа-смета ҳужжатлари тўлиқ ишлаб чиқилмаган ҳамда тасдиқланмаган;

– Белгиланган тартибда шаҳарсозлик кенгашидан ўтмаган;

– Меҳмонхона мажмуаси объекти бош режасини натурага кўчириш далолатномаси расмийлаштирилмаган (ШНҚ 3.01.01-03нинг 2.4 банди бажарилмаган);

– Қурилиш объектида фойдаланилган қурилиш материалларининг талабларга мувофиқлиги тўғрисидаги паспорт ва сертификатлари тақдим этилмади;

– ШНҚ 3.01.01-03нинг 7.8,9.9 бандларига асосан ёпиқ ишларни гувоҳлаш далолатномалари тақдим этилмади.

Юқоридаги камчиликлар мавжуд бўлса-да, қурилишга рухсат берувчи бошланғич шаҳарсозлик ҳужжатлари расмийлаштирилмаган ҳолда қурилиш-монтаж ишлари конструкциялар битгандан сўнг «Констант проект» МЧЖ томонидан лойиҳа ҳужжатлари тўлиқсиз ишлаб чиқилган. «Триумф Проект» МЧЖ хусусий экспертиза ташкилоти томонидан тўлиқ ишлаб чиқилмаган лойиҳа ҳужжатларига бирламчи рухсат берувчи ҳужжатлар ҳам йўқ. Шунингдек, Вазирлар маҳкамасининг 2016 йил 22 январдаги 15-сонли қарорининг 21-бандига зид равишда 2018 йилда 24 мартда ижобий хулоса берилган.

Қурилиш давомида ҳудудий инспекция ходимлари томонидан бир неча бор қурилишни тўхтатиш бўйича кўрсатмалар берилган бўлса-да, фуқаро Ф.Ҳалилов томонидан иш ўзбошимчалик билан давом эттирилган. Меҳмонхона қурилиши объекти бўйича махсус лицензияга эга «СВП МAСКAН» МЧЖ мутахассислари томонидан 2016 йилда бинонинг техник ҳолати ўрганилиб, ригел ва темир бетон рамаларни кучайтириш учун лойиҳа ҳужжатлари ишлаб чиқиш бўйича хулоса берилган.

Ушбу кучайтириш бўйича тегишли лойиҳа ишлаб чиқилмаган ва экспертиза органларининг ижобий хулосаси олинмаган.

«Ўзоғирсаноатлойиҳа»AЖ ва ҳудудий инспекция ходимлари томонидан 2022 йил 6 май куни бинонинг сейсмик ҳолати ўрганиб чиқилиб, «Ўзоғирсаноатлойиҳа» AЖнинг хулосасига асосан бинонинг КМК, ШНҚ талабларига жавоб бермаслиги ва колонналарнинг айрим жойлари дарз кетгани ўз тасдиғини топган ҳамда бинони бузиш бўйича хулоса берилган», дейилади Қурилиш вазирлиги эълон қилган муносабатда.

Kun.uz мухбири ҳолат юзасидан изоҳ олиш мақсадида меҳмонхона эгаси Фурқат Ҳалиловга юзланди. Унинг айтишича, 12 қаватли бинонинг дастлабки 4 қавати сувенир дўконлари, энг юқори икки қават ресторан ва орадаги қаватлар меҳмонхона қилишга мўлжалланган. Пастида икки қаватли музлаткич вазифасини бажарувчи ертўла ҳам бор. Қурилиш 2012 йилда бошланган ва тадбиркор унга 3 миллион доллар пул сарфлаганини айтди. Фурқат Ҳалиловнинг айтишича, лойиҳа архитектори япониялик бўлган ва қурилишни битта корхона бошидан охиригача амалга оширган.

Меҳмонхона эгаси 10 йилдан буён давом этаётган қурилишга рухсат олишга кўп марта ҳаракат қилгани, аммо доим мужмал жавоб олганини айтди. Фурқат Ҳалилов бинони бузишга берилган хулосадан ҳам норози бўлганини таъкидлади. Қурилиш эгаси меҳмонхона барча хавфсизлик ва сейсмик талабларга жавоб бериши, қўшниларининг қурилишга қарши эмаслиги бўйича рухсати ҳам борлигини маълум қилди.

Маълумот учун, ушбу меҳмонхона Самарқанд туманидаги Имоми Аъзам номидаги масжид яқинида, машҳур қоғоз ишлаб чиқиладиган ҳунармандчилик марказига кетадиган йўл бўйида жойлашган. Ушбу бино ҳақида охирги вақтларда кетма-кет блогерлар ва ижтимоий тармоқ фаоллари ёза бошлагач, расмий идоралар муносабат билдирди. 10 йил аввал қурилиши бошланган ва Самарқандда жуда машҳур бўлган бино тақдири ҳақида бунгача ҳеч бир ташкилот расмий муносабат билдирмаганди.

Қонунчиликка кўра, бирор бино бузилиши учун тегишли суд қарори бўлиши талаб қилинади. Ҳокимлик тадбиркорни 2016 йилда судга берган ва тадбиркорнинг айтишича, иш кўрилмай қолдирилган. Тез орада бу борада Kun.uz’да тўлиқ суриштирув эълон қилинади.