Тошкентда оралиқ масофа сақламаган Nexia-3 автобусга урилиши оқибатида ҳайдовчи вафот этди

Тошкентда «МАН» русумли автобус ва «Нексия-3» русумли енгил автомобиль иштирокида йўл-транспорт ҳодисаси содир бўлди. «Тошшаҳартрансхизмат» ахборот хизмати ҳолат бўйича расмий маълумот берди.

Жорий йилнинг 3 июнь куни соат 16:27 да «Нексия-3» русумли енгил автомобиль ҳайдовчиси У.О автомобилни Кичик ҳалқа йўли кўчаси бўйлаб Бунёдкор шоҳкўчаси томонга бошқариб бораётган бўлган.

Хабарда айтилишича, у белгиланган йўл ҳаракати қоидаларига риоя қилмасдан олдинда ҳаракатланиб кетаётган транспорт воситаси билан оралиқ масофа сақламагани ҳамда катта тезликда ҳаракатлангани сабабли олдидаги пиёдаларни ўтказиш учун тўхтаган «7-Автобус саройи» филиалига бириктирилган, 69-йўналишдаги, ҳайдовчи Х.Х (1976 йилда туғилган, стажи 18 йил) бошқарувидаги «МАН» русумли автобуснинг орқасига келиб урилган. 

Натижада, енгил автомобиль ҳайдовчиси Республика шошилинч тез ёрдам илмий марказида вафот этган.

Ҳозирда мазкур йўл-транспорт ҳодисаси бўйича Тошкент шаҳар Ички ишлар бош бошқармаси томонидан дастлабки тергов ишлари олиб борилмоқда.

«Тошшаҳартрансхизмат» АЖнинг ҳаракат хавфсизлигини назорат этиш бўлими томонидан хизмат суриштируви ўтказилади.