Ўзаро тўқнашган Nexia ва Labo машиналарининг ҳайдовчилари ҳайдовчилик гувоҳномасига эга бўлмаган.
Самарқанд вилояти ИИБ ахборот хизматининг Kun.uz’га хабар беришича, 2022 йил 26 июн куни соат 15:30 ларда Паст Дарғом тумани Бахшивойи маҳалласи ҳудудидан ўтган ички йўлда одам ўлими билан боғлиқ йўл-транспорт ҳодисаси содир бўлган.
19 ёшли йигит ўз бошқарувидаги Nexia билан кетаётиб қоидаларни бузган ҳолда ўзидан олдинда кетаётган машинасини қувиб ўтмоқчи бўлганда қарама-қарши томондан келаётган Labo машинаси билан тўқнашган.
Оқибатда, Labo машинасининг 33 ёшли ҳайдовчиси оғир тан жароҳатлари олиб, шифохонага ётқизилган. Аммо шифокорлар томонидан кўрсатилган муолажаларга қарамасдан у вафот этган.
Суриштирувларда, иккала ҳайдовчи ҳам ҳайдовчилик гувоҳномасига эга эмаслиги аниқланган.
Қайд этилишича, ҳолат юзасидан Паст Дарғом тумани ИИБ томонидан Жиноят кодексининг 266-моддаси 2-қисми билан жиноят иши қўзғатилган. Ҳозирда тергов-суриштирув ҳаракатлари олиб борилмоқда.
Аввалроқ, Самарқандда тезлик қоидаларини бузиб ҳаракатланган Nexia ҳайдовчиси содир этган ЙТҲда 52 ёшли аёл вафот этганди.