Туркияда DW ва «Америка овози» сайтлари блокланди

Туркия радио ва телевидение олий кенгаши хорижий онлайн ОАВдан онлайн интернетда ишлаш учун лицензия олишни талаб қилмоқда. DW бу ҳаракат Анқарага таҳририят контентини цензура қилишга имкон беради, деб ҳисоблайди.

30 июнь, пайшанба оқшомида Туркияда Deutsche Welle медиакомпаниясининг сайти блокланди. Тегишли қарор Анқара суди томонидан қабул қилинди, дея изоҳ берди Туркия радио ва телевидение олий кенгаши (RTÜK) бошқаруви вакили. Гап барча 32 трансляция тилидаги веб-саҳифалар ҳақида кетмоқда, дейилади DW хабарида. 

Медиакомпания турк томонининг позициясига суд орқали эътироз билдирмоқчи. DW’дан ташқари, блоклаш «Америка овози» радиостанциясига ҳам таъсир кўрсатди. 

Бир неча ой олдин RTÜK хорижий телерадиокомпаниялардан интернетда эфирга чиқиш лицензияси учун ариза топширишни талаб қилди. DW нашрига кўра, бундай ҳаракат «Туркия ҳукуматига таҳририят контентини цензура қилишга имкон беради» ва «мустақил медиа учун қабул қилиб бўлмас ҳолат». DW бош директори Петер Лимбургнинг айтишича, компания позицияси турк медиарегулятори раис билан «кенг кўламли ёзишмаларда ва ҳаттоки шахсий суҳбатда» баён этилган. 

Февраль ойида Deutsche Welle ва «Америка овози» Туркияда лицензия олиш учун ариза топширмасликларини маълум қилган эди. Туркия томонининг талаби 2019 йилда кучга кирган ҳуқуқий нормага асосланади. Худди шу йили DW Туркия қонунчилигига мувофиқ мамлакатда ўз ваколатхонасини очди. 

Айни пайтда, Германия журналистлар уюшмаси (DJV) турк томонини Deutsche Welle’га қарши чораларни зудлик билан бекор қилишга чақирди. «DW тақиқини Эрдўған автократиясининг ўзбошимчалигидан бошқа ҳеч нарса билан изоҳлаб бўлмайди», деди DJV раҳбари Франк Ибераль. Туркия халқига яна бир бор мустақил журналистикадан фойдаланиш имконияти берилиши керак, деди Ибераль. 

Туркия сўнгги йилларда оммавий ахборот воситалари устидан назоратни кучайтирди. RTÜK лицензияга эга ОАВдан идора номақбул деб ҳисоблаган онлайн контентни олиб ташлашни талаб қилиш ҳуқуқига эга. Ҳозирда мамлакатдаги асосий ОАВнинг қарийб 90 фоизи давлатга тегишли, дея таъкидлайди Reuters.