Украина инфратузилма вазири ўринбосари Юрий Васьков яқин икки ҳафта ичида Одесса области портларида қолган ва дон ортилган 16 та кема ҳам очиқ денгизга чиқарилишига умид қилмоқда.
Одесса областининг учта портида РФ билан уруш бошланишидан олдин юкланган ва Украина ғалласи бўлган 16 та кема қолмоқда. Бу ҳақда Украина инфратузилма вазири ўринбосари Юрий Васьков 1 август, душанба куни DW’га берган интервьюсида маълум қилди. У бу кемалар яқин икки ҳафта ичида жўнатилиши ва тез орада яна учтаси товар учун етиб келишига умид билдирди.
1 август куни Одесса портидан Украина дони бўлган биринчи юк кемаси жўнаб кетди. «Ушбу биринчи партия бутун бозорга Украина яна жаҳон озиқ-овқат дастурларида иштирок этишига ва жаҳон озиқ-овқат хавфсизлиги мувозанати тикланишига умид беради. Демак, бу жуда муҳим», - деди Одесса портининг собиқ раҳбари Васьков DW билан суҳбатда.
Вазир ўринбосари юк ташувчи кемалар сони «кун сайин ортиб боришига» умид билдирди. Сентябрга келиб, экспорт ҳажмини ойига 6 миллион тоннага етказиш мумкин, деб ҳисоблайди Юрий Васьков.
Унинг аниқлик киритишича, Қора денгизда миналар портлаши хавфи остида хавфсизроқ ташишни таъминлаш учун кемага махсус қайиқ ҳамроҳлик қилган.
Маккажўхори ортилган, Сьерра-Леоне байроғи остидаги Razoni кемаси 1 август куни эрталаб денгизга чиқди. Украина инфратузилма вазири Александр Кубраковнинг сўзларига кўра, у Ливанга кетган, буни Туркия Мудофаа вазирлиги тасдиқлаган.
Истанбул дон экспортини назорат қилиш маркази маълумотига кўра, юк кемасида 26 минг тоннадан ортиқ маккажўхори олиб кетилмоқда. Марказ, шунингдек, Razoni 2 август куни Туркия ҳудудий сувларига етиб келиши кутилаётганини билдирди. Текширувдан сўнг кема Триполига йўл олади.
Украина ҚК Ҳарбий-денгиз кучлари матбуот маркази таъкидлашича, юк кемасининг ўтиши синов тарзида амалга оширилаётган бўлиб, у Қора денгиздаги «дон йўлаги» фаолиятини текширишга мўлжалланган. «Ушбу натижаларга кўра, тегишли қарорлар қабул қилинади», — дейилади баёнотда.
