ИИВга автомактаблар ва имтиҳон марказларига лицензия бериш ваколати ўтказилиши мумкин

Қонунчилик палатасидаги “Миллий тикланиш” демократик партияси фракцияси навбатдаги йиғилиши бўлиб ўтди.

Фото: Sputnik

Депутатлар “Айрим қонун ҳужжатларига йўл ҳаракати хавфсизлиги тизимини такомиллаштиришга қаратилган ўзгартиш ва қўшимчалар киритиш тўғрисида”ги қонун лойиҳасини кўриб чиқди.

Амалдаги тартибга кўра, ҳайдовчилик ҳуқуқини берувчи гувоҳномани олишга ўқитиш тадбиркорлик субъектларига берилган бўлиб, уларга тегишли лицензиялар Таълим сифатини назорат қилиш давлат инспекцияси томонидан берилиши белгиланган.

Таклиф этилаётган қонун лойиҳасида йўлларда ҳаракатланиш хавфсизлигини таъминлаш мақсадида эндиликда ҳайдовчиларни тайёрловчи таълим субъектлари ва имтиҳон марказларига бу турдаги фаолиятни амалга ошириш ҳуқуқи учун лицензия Ички ишлар вазирлиги томонидан берилиши белгиланмоқда.

Билдирилишича, қонун лойиҳаси қабул қилиниши ҳайдовчиларни тайёрловчи таълим субъектларига лицензия бериш ва уларни фаолиятини назорат қилиш ягона давлат органи — ички ишлар органлари йўл ҳаракати хавфсизлиги бўлинмалари ваколатига ўтказиш орқали таълим сифатини оширилишига ҳамда йўлларда ҳаракатланиш хавфсизлигини таъминланишига эришилади.

Мазкур қонун лойиҳаси депутатлар томонидан қўллаб-қувватланди.