Бугун, 22 август куни Тошкент метросида яна техник носозлик юз берди. “Тошкент метрополитени” ДУК ҳолат бўйича расмий маълумот тақдим этди.
Қайд этилишича, тонгги соат 05:55 да 11-сонли ҳаракат таркиби 2-йўналиш бўйлаб «Халқлар дўстлиги» бекатига кириб келган.
Билдирилишича, контакт релсида кучланишнинг пасайиши оқибатида машинист йўриқномага асосан поездни ҳаракатдан тўхтатган.
Энергия тизими томонидан захира қурилмалари орқали контакт релсига юқори кучланиш берилган ва ҳаракат таркиби ҳаракатланишда давом этган.
Маълум қилинишича, ҳозирда поездлар ҳаракати доимий жадвал асосида давом этмоқда.
