Супер-контракт бўйича янги тартиб белгиланди

Давлат қабул комиссияси қарори билан супер-контракт бўйича қўшимча тартиблар белгиланди. Бу ҳақда блогер Хушнудбек Худойбердиев хабар бермоқда. Олий таълим вазирлиги ҳозирча бу борада маълумот бермади.

“Энг катта янгилик, бу – абитуриент ўзи танлаган БИРИНЧИ йўналишга кира олмаган, лекин 2-, 3-, 4- ёки 5-йўналишлардан бирига ўқишга кирган бўлса, унда ўз хоҳиши билан БИРИНЧИ танлаган йўналишида супер-контрактда ўқишига рухсат берилади.

Бу истисно 2-, 3- ёки 4-йўналишга тааллуқли эмас. Яъни бешинчи йўналишга ўқишга кирган абитуриент иккинчи ёки тўртинчи йўналишни танлаб супер-контракт қила олмайди, фақат БИРИНЧИ йўналишга қилиши мумкин.

Шунингдек, танлаган бешала йўналишига ҳам ўқишга кира олмаган абитуриентлар исталган бешта йўналишдан бирини танлаб, супер-контрактда ўқишига рухсат берилади”, – дея ёзди блогер.

Эслатиб ўтамиз, супер-контракт бўйича аризалар 1 октябргача, kontrakt.edu.uz сайти орқали қабул қилинади.