Нью-Йоркдаги Sotheby’s аукционида тираннозаврнинг кичик қариндоши бўлмиш нанотираннуснинг (Nanotyrannus) ноёб скелети 47,3 миллион долларга сотилди. Шу тариқа у тарихдаги иккинчи энг қиммат қазилма топилмага айланди.
Ушбу намунага Жоди деб ном берилган. Унинг қиймати дастлаб 6–9 миллион доллар атрофида баҳоланган эди. Аукционда нархларнинг бу даражада ошиб кетишига скелетнинг ҳолати сабаб бўлди: у бугунги кунда олимларга маълум бўлган нисбатан бутун сақланган учта нанотираннус скелетидан биридир.
Жодининг баландлиги тахминан 2 метр, узунлиги эса 6 метр келади. Тошқотган қолдиқ 2019 йилда монтаналик фермер аёл Жоди Пирсон томонидан топилган.
Нанотираннус узоқ вақт давомида алоҳида тур сифатида эмас, балки янглишиб ёш тираннозавр деб ҳисобланган. Уларнинг қолдиқлари илк бор 1940 йиллардаёқ топилган эди. Тадқиқотчилар яқиндагина бу барибир алоҳида тур деган хулосага келди.
Сотилган нанотираннуснинг нархи аукционда динозавр скелети учун тўланган рекорд суммадан атиги уч миллион долларга кам. Жорий йилнинг июль ойида Гас лақабли тираннозавр скелети кимошди савдосида 50,1 миллион долларга сотилган эди. У шу кунгача топилган энг йирик тираннозаврлардан бири бўлган.
Шу билан бирга, CNN телеканалининг қайд этишича, бундай тошқотган қолдиқларнинг сотилиши илмий ҳамжамиятнинг танқидига сабаб бўлган:
«Биз нанотираннус ҳақиқатан ҳам мавжуд бўлганини эндигина билиб олдик, ҳозир эса энг яхши скелетлардан бири энг юқори нарх таклиф қилган харидорга сотиб юборилади. У музейга қўйилиб, болалар, оилалар ва кенг жамоатчиликни ҳайратга солиш ҳамда илҳомлантириш ўрнига, қайсидир коллекционернинг омборида йўқолиб кетиши мумкинлигини ўйлашнинг ўзи даҳшатли», — деди Шотландиядаги Эдинбург университетининг палеонтология ва эволюция профессори Стив Брусатте.
Тошқотган қолдиқни сотиб олган шахснинг исми номаълум. Скелет унга барча ҳуқуқлари билан бирга ўтди, бу эса харидор унинг нусхаларини музей ва коллекционерларга сотиши мумкинлигини англатади.
