АЭХА: ЗАЭСнинг энергия тизими билан алоқа линияси тикланди

Запорижжя атом электр станциясидаги Атом энергияси бўйича халқаро агентлик (АЭХА) вакиллари бир кун аввал шикастланган электр тармоғи билан алоқа линияси тиклангани ва объект Украина электр тармоғига қайта уланганини тасдиқлади. Бу ҳақда агентлик бош директори Рафаэл Гросси Twitter'да ёзган.

Фото: CNN

Бироқ, бу қабул қилиб бўлмайдиган вазиятда фақат «вақтинчалик енгиллик», дея қўшимча қилди у ва Европадаги энг йирик атом электр станцияси атрофида хавфсизлик зонасини яратиш зарурлигини яна бир бор таъкидлади.

Бундан олдин Путин Запорижжя АЭСни Россия мулкига ўтказиш ҳақидаги фармонни имзолаганди.

Россия президенти ҳукуматга «Запорижжя атом электр станциясидаги атом энергиясидан фойдаланиш объектларининг федерал мулкка қабул қилинишини таъминлаш»ни топширди.

Бундан ташқари, станциянинг ишлаши учун «Запорожская АЭС» Федерал давлат унитар корхонаси ва «Запороже АЭСни эксплуатация қилувчи ташкилот» ОАЖ ташкил этилиши режалаштирилган.